I-TB ihlasela idlavuze noma yikuphi
I-TB ingumbulalazwe uqobo, ikakhulu lapha kwelakithi eMzansi isona sifo esizishaya siziqwaqwade zonke emakhanda ngokudlula nemiphefumulo yabantu.
Lokhu kwenzeka nje isifo iTB sibe selapheka siphele; umbuzo umile othi yini pho lesi sifo kube yisona esihamba phambili ekubulaleni abantu bakithi? Enye yezimbangela zalesi simo imfundiso engaphelele ethi iTB itholakala kuphela emaphashini, okusho ukuthi kulindeleke ukuthi ukhwehlele njalo nje uma unalesi sifo.
Uma ungakhwehlelenga hhayi akusesiyona iTB; sekungesinye isifo esingabangwa imimoya, idliso, ilumbo nokunye okuyela kulokhu.
Lolu “lwazi” engithi aluphelele lwenza ukuthi uma esikhwehleleni kungatholakali lutho, esithombeni sesifuba nakhona kungekho lutho, kugcizeleleke ukuthi ngempela umuntu lowo akaguliswa iTB. Nathi basebenzi bezempilo sinawo umthelela ekubhebhethekiseni lo mcabango. Kuyacaca ukuthi kuningi okumele kwenziwe ukuphendula loya mbuzo othi: “Uma iTB yelapheka iphele pho yini lena eyenza lesi sifo siqhubeke siziqwaqwade amakhanda ezinye izifo ngokuba umbulalazwe?”
Namhlanje asibhekane nokugcizelela ukungakhethi bala kwegciwane elibanga isifo iTB: emaphashini yilona, emathunjini, esibindini, ezinsweni, ezibilini ezingaphakathi esiswini yilo leli gciwane; emathanjeni, emajoyintini nakhona liya liphindelela, ebuchosheni, emizweni, enhliziyweni, ngisho nasezinhlamvini zobulili besilisa imbala; empeleni alikhethi lishaya kwasani. Kubalulekile ukukhumbuzana ngalokhu kuba ngumashaya zonke kwaleli gciwane ngoba njengoba sesishilo abaningi bathanda ukugcizelela ngokuthi lidala isifo samaphaphu kuphela kanti akunjalo.
Igciwane leTB lijwayele ukungena ngentuba yomoya kumuntu, lihambe liyoqaqela lakhe amadlangala emaphashini.
Lifike lenze umonakalo walo lapha bese liguguleka lokhele ligobhoze ngegazi seliya kwezinye izingxenye zomzimba liyodala umonakalo khona.
Njengoba sichazile ngenhla iTB ingahlasela noma yikuphi. Ingafika esiswini ihlasele amathumbu ize iwaqaqele ngegciwane layo iphinde ihlasele izindlala ezingaphakathi esiswini.
Ohlaselwe useyozwa ngobuhlungu, aqunjelwe kungayeki ngaphandle, asuze kakhulu ngokungajwayelekile, sikhukhumale isisu, kokunye kwakheleke okusamanzi ngaphakathi emathunjini nasontwini. Ogulayo useyokhathala, angakuthandi ukudla, anciphe emzimbeni, kokunye ajuluke, azibone ephela nje.
Yilesi simo esidida abantu abaningi, agule umuntu kube yinqaba. Babheke esifubeni, akhwehlele bangatholi lutho olubambekayo, abe kodwa eqhubeka eya phambili nokugula.
Ake ngikuxoxele ukuthi kukaningi ngihlangana neziguli ezikhala ngobuhlungu bamathambo obungapheli. Ngikhuluma lapha ngamathambo abuhlungu ngokudlulele, osuzame konke kuwo kodwa lutho ukuba ngcono. I-TB yamathambo iyabubanga lobu buhlungu, okuthi noma usuhambe bonke osiyazi ubuhlungu buthi angiyi ndawo. Inselelo enkulu ukuthi ayikho kahle indlela eqondile ngqo yokuhlonza ukuthi ngempela ngempela la mathambo abuhlungu kangaka abangwa yiTB.
Esikwenzayo isikhathi esiningi ukuhlungahlunga ezinye izifo sizibeke eceleni, kuze kuthi ekugcineni sisale neTB njengembangela. Akulula ukuvele uye ngqo kulesi sifo.
Okunye okuyaye kusize ukuthola kuso isiguli ukuthi izinhlungu zenzenjani uma silele okanye uma sizihlalele nje umzimba unyakaza kancane? Lokhu kubalulekile ngoba izinhlungu zamathambo ezibangwa yigciwane iTB ziyaqhubeka zikubelesele uma ulele ngenxa yokuthi amagciwane alesi sifo atshakadula kangcono uma ulele okanye uma umzimba uziphumulele; ngakho izinhlungu zilokhu zikhona.
Lokhu akufani nalapho ubuhlungu bamathambo namajoyinti bubangwa umkhuhlane wamathambo lapho othola khona ubungconywanyana uma ulele noma uziphumulele. Kubalulekile ukuhlale sikhumbula lowo mehluko njalo nje uma sikhuluma ngobuhlungu bamathambo.
Mpilonde!