Bavale amasango abazali befuna othisha
BAVALE amasango esikole abazali bezingane ezifunda eQuarry Heights Primary, eNewlands East, eThekwini, bethi kunamakilasi amabili kulesi sikole angenabo othisha.
Abazali bathe amakilasi amabili kaGrade1 awanabo othisha kusukela kuvulwe izikole ngoFebhuwari, umhloli uthi ukwenze konke ukuze isikole sithole othisha.
UMnuz Khethukuthula Jaca osesigungwini esilawula isikole, iSchool Governing Body (SGB), uthe awukho umgudu abangawulandelile kodwa abasizakali yingakho sebekhethe ukuvala amasango ukuze kufike umhloli azochazela bonke abazali ukuthi yini abambile.
"Othisha abebekhona nyakenye omunye uthole umsebenzi kwesinye isikole, obeyitoho inkontileka yakhe yanqanyulwa ngoDisemba. Sinabo othisha kwaGrade 1 ebebengenyuselwa kuleli kilasi kodwa besingafuni ukuthi kube yithina esitshela umnyango ukuthi awenzeni ngoba thina sifuna othisha. Besinethemba lokuthi sizobathola njengoba kade kususwa othisha ezikoleni ezinabafundi abancane beyiswa kwezinabafundi abaningi, akwenzekanga lokho,” kusho yena.
Omunye wabazali uthe bakhokhela omalume ukuthi balethe izingane esikoleni zifike zihlale kungekho thisha ozifundisayo.
UJaca uthe uthishanhloko iqhinga abengalenza elokuthi laba bafundi bafakwe kwamanye amakilasi anabo othisha inkinga ukuthi ikilasi ngalinye linesibalo esithile sabafundi okumele lisithathe ngoba kuneCovid-19.
"Lezi zingane ezihlala zodwa emakilasini zisengcupheni yokuthi zithelelane ngeCovid-19 njengoba engekho umuntu ozibhekile. Uma sithi uthisha akaphume ekilasini lakhe ayofundisa lezi zingane, uma kuba nenkinga esaphumile angaba senkingeni," kusho yena.
Abazali bagcine sebevale umgwaqo omkhulu ohamba izimoto odlula kule ndawo ngoba bethi uthishanhloko akafiki.
UMnuz Muzi Mahlambi okhulumela umnyango, uthe bayasigxeka isenzo sabazali sokuphazamisa nezinye izingane ezinabo othisha ngoba befuna othisha.
“Bekumele benze uhlelo lokuthi bathumele abazali abambalwa abazoya kothola isixazululo emnyangweni. Ukuvala isikole nomgwaqo akuyona indlela eyiyo yokulungisa izinto. Sizobheka ukuthi yini ebambe ukuthi lesi sikole sithole othisha kuze kuhambe isikhathi eside kangaka,” kusho yena.