Ufuna ukuba kwiTop 10 kwiComrades ezayo
UMGIJIMI uNkosikhona Mhlakwana ufunga uyagomela ukuthi uzongena kwabayishumi bokuqala kwiComrades Marathon ngonyaka ozayo.
UMhlakwana ongesinye sezithenjwa zeMaxed Elite AC utshele Isolezwe ukuthi ngeke abe naKhisimusi njengoba eseqale amalungiselelo eComrades yangonyaka ozayo. Uwaqale ngempelasonto okuphunywa kuyo.
Umqeqeshi wakhe uProdigal Khumalo ongadingi kuchazwa ngamagalelo akhe kwiComrades, ubenze umjaho wokuziqeqesha.
“IComrades umjaho onzima ngendlela eyisimanga. Nakuba kunjalo, ngonyaka ozayo ngizimisele ukuphuma kwabayishumi bokuqala. Kangifuni ukuzifaka ingcindezi ngithi ngizoyiwina, konke kuyocaca emzileni,” kusho uMhlakwana obengomunye wabebemenywe ngabahleli beComrades, iComrades Marathon Association (CMA) kwethulwa i-Orange Grove njengabanye abaxhasi bomjaho.
Ngonyaka odlule uMhlakwana wayeqala ukugijima iComrades kodwa wathola indawo ka-11.
Kwala kancane angene kwabayishumi abaphambili kodwa kwacaca ukuthi amandla ayamphelela sekuyiwa ngasentanjeni.
Abahleli bomjaho baveze ukuthi owangonyaka ozayo uzoba ngoJuni 13, usuka eMgungundlovu ulibhekise eThekwini. Kulo nyaka iComrades ayizange ibekhona ngenxa yeCoronavirus.
Nakuba bekuhlasele igciwane, uMhlakwana uthe kalizange liziphazamise izinhlelo zakhe. Uthe lesi sifo simphazamise ekugijimeni iComrades kuphela engazange ibe khona.
Ekuqaleni kwalo nyaka uwine iHillcrest 21km, waphuma isibili kwiJL Dube Marathon, wenze isikhathi esihle egijima iComrades Virtual Marathon.
Emasontweni adlule uphume indawo yesibili kwiCape Town Virtual eqoqweni abeligijimela eKapa. “Kangifuni ukuqamba amanga, iCovid-19 kayizange iziphazamise izinhlelo zami. Kube yiComrades kuphela engingayigijimanga. Ngijabulile futhi nangezikhathi engizenzile. Ngonyaka ozayo ngizimisele ngokubhukula,” kusho uMhlakwana.