Unina usekhala ubusuku nemini ngowaduka eyolusa
UKHATHAZEKILE umndeni womfundi oneminyaka eyisithupha owalahleka ehamba nabangani bakhe beyolanda izinkomo emadlelweni ngo-Agasti 29.
UZabelo Lungelo Nala waseMndunduzeli, eNkandla, kusolakala ukuthi wanyamalala ngesikhathi kuqhamuka abazingeli ababehamba nezinja eziningi.
Kuthiwa yena wabaleka wabuyela ngasekhaya, bonke ayehamba nabo babalekela ngalapho babeyolanda khona izinkomo. Kubikwa ukuthi lesi sehlo senzeka sebesezintabeni zasesigodini eMatholemgele khona eNkandla.
UZabelo ungumfundi kaGrade 1 eMndunduzeli Primary.
Umndeni wakhe uthi usumbheke yonke indawo ngokubambisana namalungu omphakathi, abaholi namaphoyisa kodwa akatholakali. Lo mndeni usukhalela okungenani ithambo lakhe ukuze ulingcwabe uma kuwukuthi akasekho emhlabeni
Uninakhulu kaZabelo, uNksz Shalazile Nala, uthe usekhala ubusuku nemini unina wengane edukile uma ecabanga ngayo.
UNksz Nala uthe uZabelo wayehamba nezingane zakamakhelwane eyolanda izinkomo futhi kunabantu abambona edwanguzela yedwa esekhala ngesikhathi esedukelene nayehamba nabo.
Uthe indawo alahlekela kuyona ayinamahlathi, wukhalo nje.
“Asitholi nento ayeyigqokile nje. Izulu lalingelihle kangangoba samcinga sekunenkungu, lina ngosuku anyamalala ngalo,” kusho uNksz Nala.
UZabelo unyamalale egqoke isikibha esibomvu esinemikhono emide, ibhulukwe elibubende, ijakhethi eluhlaza namabhuzi amnyama.
Okhulumela amaphoyisa KwaZulu-Natal, uColonel Thembeka Mbele, uthe uphiko lwamaphoyisa oluphenya amacala odlame emndenini, ukuvikelwa kwezingane nawocansi eShowe, licela umphakathi ulifunise uZabelo.
UColonel Mbele uthe unoma ngubani ongaba nolwazi olungaholela ekutheni atholakale angathinta umseshi uSgt. Sifiso Mpungose enombolweni ethi: 079 696 3440 noma ethi: 035 473 0022.
Bangashayela neyeCrime Stop ethi: 08600 10111.