I-SABC noNdlovu abalungise udaba
UMA kuyisikhathi sokuphela konyaka olunye usuku olubhekwa kakhulu olukaNcibijane, ngenxa yokuthi kusuke kunesasasa lokuzwa ingoma ehambe phambili kunazo zonke kulowo nyaka.
Abantu basuke bevotele izingoma eziwu-10 eziteshini ezehlukene okuyizona ezithakaselwe kakhulu.
Ngalolu suku iziteshi ezisuke zibhekwe kakhulu ezomsakazeli womphakathi, iSABC.
Ngokwehlukana kwezilimi iziteshi zihlukanisa unyaka ngengoma ekhethwe ngabalaleli balezi ziteshi ngevoti.
Komunye unyaka kuke kwenzeke eziningi zihlukanise ngengoma efanayo, kwesinye isikhathi ihluke.
Ngonyaka odlule akubanga kuhle esikubonile kwenzeka phakathi kweSABC nomunye wabasayine inkontileka ehambisana nokuvota u-Owen Ndlovu.
U-Owen waqhamuka neqhinga lokuthi abantu kube yibona abavotayo ukuze unyaka uhlukaniswe yingoma ethandwa yibo.
Iqhinga wase elikhuluma neSABC kwaba yinto bonke ababona ukuthi inhle ingabasebenzela futhi ngempela kwenzeka njalo.
Kodwa uma sekukhona izinguquko kubo bobabili, lokho akuphoxanga nje indlela iSABC esebenza ngayo no-Owen kodwa izwe lonke laphoxeka uma ingasabi bikho ingoma ezohlukanisa unyaka.
Kwaba yihlazo okwenzeka ngoba kwacaca ukuthi kukhona oyedwa owayeseshintshe umqondo ngesivumelwano abanaso kodwa bangahlala phansi, kunalokho baqhubeka nokwenza izinto ngendlela yabo engafani.
Ngendlela abantu ababephoxeke ngayo sithemba ukuthi ngenye yezinto esingeke siphinde siyibone.
Sifikile manje isikhathi sokuthi abantu baphinde bazikhethele ingoma abafuna ukungena ngayo onyakeni ka-2021, ngakho iSABC no-Owen abayilungise kusemanje indaba ethinta lo mcimbi.
Ukuzibana ekubeni benesivumelwano esifana nalesi akusizi ngoba ekugcineni bayadingana.
I-SABC ayizame ukulinda iqede isivumelwano eyasisayina no-Owen.
No-Owen uma isivumelwano sakhe sesifinyelele emaphethelweni neSABC, akaqhubekele phambili uma sebengasathandi ukusebenza naye.
Lokho kungenza singadicileleki phansi isithunzi seSABC ngoba umphakathi uthembele kuyo uma kuziwa ezingomeni nobumnandi obubakhona ngoNcibijane.