Uvelile uthisha oncakaze uzakwabo phambi kwabafundi
USEGQIGQA kubeluleki bengqondo ngenxa yokuzizwa ehlazekile uthisha okuthiwa uqhunyiswe ngezimpama nguzakwabo “oyisidlamlilo” phambi kwabafundi efundisa ekilasini.
UNkk Modesty Mtshali ofundisa eMgitshwa High eShowe, ekhuluma neSolezwe izolo uvele wakhihla isililo echaza indlela ahlanjalazwe ngayo wuzakwabo wesifazane abafundisa naye okuthiwa umshaye phambi kwabafundi kubangwa izikhathi zokufundisa, ngeledlule.
“Bengisanda kuqala ukunikeza abafundi amaphepha njengoba bebelungiselela ukubhala isifundo sezoLimo ngesikhathi egulukudela. Uqale ngokuthethisa abafundi ebuza ukuthi bafundani okuthe uma ngizama ukumkhuza wakhwela wadilika kimi, wangishaya ngezimpama cishe eziyisikhombisa kwaze kwalamula omunye wabafundi ngokungena phakathi kwethu,” kusho uNkk Mtshali.
Uthe ulimale kabi esweni futhi akakalubhadi esikoleni, usahamba abeluleki bezengqondo.
Uqhube wathi ingxabano yabo iqale ngesikhathi kubangwa izikhathi zokubuyekeza izifundo zika-matric ebezibhalwa ngesonto eledlule.
Uthe yena ufundisa ezoLimo kanti lo thisha ufundisa iSayensi. Zombili lezi zifundo bezibhalwa ngesonto eledlule ngezinsuku ezilandelanayo.
Inkinga uthe iqale ngesikhathi sekumele bacazelane izikhathi zokufundisa, esontweni elalandulela okwakuzobhalwa ngalo.
Uthe lo thisha wenqaba ukumnika ithuba lokufundisa, ekhala ngokuthi uzophazamisa abafundi bangagxili esifundweni sakhe.
“Abafundi babuyekeza isifundo sakhe kusuka ngoLwesithathu kwaze kwawuMgqibelo. Ngagcina nginquma ukuthi isifundo sami sizobuyekezwa ngeSonto ngoba kwakucaca ukuthi akafuni ukunginika ithuba lokuthi ngifundise,” kusho uNkk Mtshali.
NgoMgqibelo kuthiwa lo thisha watshela abafundi ukuthi bangezi esikoleni ngeSonto ngoba ubesekhulumile noNkk uMtshali bavumelana ngokuthi akazoba khona esikoleni.
NgeSonto uthe wafika kukhala ibhungezi kungekho mfundi.
Uthe ngesikhathi eyizeka le ndaba kwabe uyinyathele emsileni kulo thisha owadinwa wagana unwabu.
“Ngemuva kokuthi abafundi beqeda ukubhala iphepha leSayensi, ngibacele ukuthi ngihlanganyele nabo kubuyekezwe isifundo sami ngoba nabo babenesifiso sokuthi bangabhali singakhumbuzene okungase kuphume. Ngithe ngisaqala nje, wagulukudela ekilasini wangisola ngokukhuluma kabi ngaye phambi kothisha. Ngizame ukumbonisa ukuthi okungenani sikhulumele egunjini lothisha kwabe ngibhebhethekisa ukucasuka, wangishaya ngezimpama endaweni eyodwa kwaze kwasukuma umfundi ozidele wangena phakathi kwethu,” kubalisa uNkk Mtshali.
USihlalo wesigungu esengamele isikole uMnuz Bongumusa Mhlongo, uthe akukhona okokuqala lo thisha ehlambalaza abanye othisha phambi kwabafundi.
“Useke wachapha ngenhlamba omunye wothisha phambi kwabafundi nozakwabo. Ngasekuqaleni konyaka kunomfundi ozame ukuzibulala ngoba lo thisha embize ngesidomu phambi kwabafundi okuholele ekutheni umnyango umthathele izinyathelo, kodwa akakhombisi ukushintsha,” kusho uMhlongo.
Okhulumela uMnyango wezeMfundo KwaZulu-Natal uMnuz Kwazi Mthethwa, usigxekile lesi senzo.
“Ayikho imibiko esisayitholile ngalolu daba. Udlame ezikoleni aluyona into eyamukelekile,” kusho uMthethwa.
Okhulumela amaphoyisa uColonel Thembeka Mbele, uthe kuvulwe icala lokushaya esiteshini samaphoyisa eShowe, wathi kuboshwe umsolwa oneminyaka engu-43 obevele eNkantolo yeMantshi eShowe izolo.