Zijikile izinto ezinkunzini zaseSoweto kweyeligi
ZIJIKILE izinto emaqenjini angomkhaya baseSoweto ngaphambi kokuhlangana emzuliswaneni wesibili emdlalweni we-Absa Premiership kule sizini.
IKaizer Chiefs ne-Orlando Pirates bazohlangana koweligi ngempelasonto isimo singasefani nesandulela umzuliswano wokuqala owanqotshwa yiChiefs ngo 3-2.
La maqembu azotholana phezulu ngoMgqibelo eFNB Stadium ngo-3.30 ntambama.
Kulokhu iChiefs izoya emdlalweni isesimeni engasijwayele kule sizini njengoba isihlulwe imidlalo emibili kulandelana.
Ngempelasonto kwehle izihlathi kubalandeli bayo iwashiswa ijezi yiHighlands Park ngo 5-4 kumaphenathi ngemuva kokuthi umdlalo weNedbank Last 16 uphele zibambene ngo 1-1.
Ihlulwa nje ibisazikhotha amanxeba kulandela ukushaywa yiMaritzburg United ngo 2-1 koweligi nokunciphise igebe enalo esicongweni kwi-log ye-Absa Premiership.
IChiefs inamaphuzu awu-45 kwilog kanti ilandelwa yiMamelodi Sundowns ngamaphuzu awu-41. Uma ingaphinde ilahle amaphuzu ngoMgqibelo ingabe izifakele ingcindezi embangweni wesicoco seligi kwazise nePirates isikhona emdibini njengoba ihleli endaweni yesithathu.
Yize iPirates iphume kwiLast 32 yeNedbank Cup kodwa kungashiwo ukuthi iyona ehambela phezulu emidlalweni yeligi njengoba ingakahlulwa kusukela uJosef Zinnbauer athatha izintambo ngoDisemba. Lokhu kuhlukile nangesikhathi somdlalo wokuqala womkhaya lapho iqembu lalibhekene nesimo esasingesihle semiphumela ngaphansi kukaRulani Mokwena.
Emidlalweni eyisithupha edlule yeligi, eZimnyama zinqobe emihlanu zadlala owodwa ngokulingana.
IChiefs yona iwine kathathu, yadlala emibili ngokulingana, yadliwa kanye.
Umqeqeshi weChiefs, u-Ernst Middendorp ephawula ngemuva komdlalo weHighlands Park, ubalule ukungabi kuhle kwenkundla abebedlalela kuyona iMakhulong Stadium, eTembisa.
“Ngicabanga ukuthi kumele sibheke isimo (abebedlala ngaphansi kwaso).
“Isimo senkundla besingakuvumeli ukuthi ukwazi ukulawula ibhola. Kwenzekile sahlulwa emaphenathini kodwa akusikhona lokhu ebesikufuna,” kusho uMiddendorp.
Umqeqeshi weHighlands u-Owen Da Gama ephawula ngenkundla, uthe: “Singakhuluma ngezinkundla kodwa uma uya e-Afrika uzothola izimo ezingaphezu kwalesi. Kungenzeka ukuthi (inkundla) ibingahambisani nebhola abebefuna ukulidlala.
“Nathi uma siya kwezinye izinkundla uzifica zinamanzi. EKapa kunesomiso kodwa ufica inkundla igcwele amanzi. Kumele sisithathe lesi simo.
“Kodwa ke ngiyaqonda abekusho umqeqeshi. Bebefuna ukugcina ibhola phansi. Kodwa ke kumele ukwazi ukudlala kunoma yiziphi izimo.”
UMiddendorp uthe kuzomele bakhohlwe okwenzekile babheke umdlalo wabo ozayo.
“Umdlalo wethu olandelayo ungoMgqibelo. Kumele sigxile kuwona ngokukhulu ukushesha kwaphela nje,” kusho uMiddendorp.
Ebuzwa ukuthi ngabe umdlalo womkhaya ufike ngesikhathi esikahle, uthe: “Angazi. (Kodwa) NgoMgqibelo sinomdlalo neqembu elikhulu futhi umphumela wakhona usemqoka.”