Usafuna ezinye izindebe emuva kweMTN8
PHEZU kokuthi umqeqeshi weMamelodi Sundowns uPitso Mosimane ehlezi ethi uyazi ukuthi kusetshenzwa kanjani kwiSuperSport United – unqoba indebe eyodwa kube seyehlile ingcindezi – kodwa isitobha seqembu, uClayton Daniels, sisenentshisekelo yezinye izindebe emuva kokunqoba eyeMTN 8 edlule.
Emasontweni amabili edlule i-United, umkhaya weSundowns, ithathe isicoco seMTN 8 ihlula iHighlands Park ngo 1-0 kowamanqamu.
NgoMgqibelo izokwamukela ompetha beTelkom Knockout, iBaroka FC, emdlalweni weLast 16 ozoba seLucas Moripe Stadium, ngo8.15 ebusuku.
UDaniels uthe akakholwa wukuthi bazofika emdlalweni benengcindezi.
“Uma ufuna ukuba ngohamba phambili kumele ushaye kwasani olumi endleleni yakho. Ngikholwa wukuthi ukuzimisela nokuzethemba kuya ngokukhula eqenjini. Yebo kukhona lapho esikhubeka khona njengokuhlulwa yiPolokwane City nomdlalo we(Cape Town) City ka 3-3 lapho singazange sivimbe ngendlela esaziyo ukuthi singavimba ngayo.
“Okubalulekile wukulungisa lawo maphutha. Ngeke sithi ngoba nakhu sesinqobe iMTN 8 bese sithi sesiqedile ukudlala unyaka wonke. Sikujabulele ukuwina kodwa ngosuku olulandelayo bese sisejimini siziqeqesha ngokuzimisela. Lokhu kuyizinkomba zeqembu nomqeqeshi abazimisele. Iqembu lilambile sibheke ukuba nesizini enhle sinqobe nezinye izindebe,” kusho uDaniels.
Uthe okwamanje iqembu lonke lidlala ngokuzimisela futhi bazoya kude uma beqhubeka nokuzimisela bengaphazaminyisa wukulimala.
“UThamsanqa Gabuza uze nokuhlukile eqenjini. UBradley (Grobler) uwumqemane siphinde sibheke ukuthi kusakhona abo-Evans Rusike, Aubrey Modiba abangakafinyeleli ezingeni labo. Esiswini sinoSipho Mbule, Jammie Webber noTeboho Mokoena kanti kukhona nokaputeni wethu (Dean Furman) ofana nenhliziyo yeqembu njengoba ehlezi esikhuthaza ngokuthi sikhuphule izinga. Siyiqembu elihle. Kumele sikukholwe lokho. Ngithemba ukuthi sizokwazi ukugcina umgqigqo omuhle isizini yonke,” kusho uDaniels.