Kufufusa isimo esibi ngonozinti beChiefs
KUNESIMO esingesihle esinyonyobela iKaizer Chiefs ngonozinti bayo yize ingelinye lamaqembu athathwa njengakhiqiza onozinti beqophelo eliphezulu.
Uma lesi simo siyifica iChiefs ingazithola ibhekene nengwadla yokubhekana nezimbangi zayo ezinkulu futhi ezisabuswa wukufuna ukuziphindiselela, iMamelodi Sundowns, emdlalweni we-Absa Premiership ngoNovemba 27, bengekho onozinti bayo ababili bokuqina.
Njengoba kusabalele ukuthi u-Itumeleng Khune, ukaputeni ongunozinti wokuqina waMakhosi, ulimele, futhi uzohlala isikhathi esicela ezinyangeni ezimbili engadlali, umqeqeshi weChiefs, u-Ernst Middendorp umelwe wukuthatha isinqumo ngokuthi ubani ozobe esezintini koweTelkom Knockout neCape Town City eKapa ngoMgqibelo.
Uma evimbisa uDaniel Akpei, vele ovimbayo selokhu isizini iqalile, kuzomele amdonse ngendlebe ukuthi angalitholi ikhadi eliphuzi ngoba usenamakhadi amathathu kule sizini.
Uma engabhalwa ngoMgqibelo u-Akpei uzokweqiwa wumdlalo owodwa okungoweSundowns abasanda kuyinenebula kwiShell Helix Cup. Ngemuva kokutaxwa kweSundowns ngo 4-2, uPitso Mosimane ukhombise izimpawu zokuthi umdlalo ongoNovemba 27 ekuhambeni uzobe ungowamagqubu.
Njengoba iChiefs ikhulule onozinti abafana noVirgil Vries noBrylon Petersen ekupheleni kwesizini edlule, isele noKhune (olandelwe wukulimala), Akpei (ongase eqiwe wumdlalo), Bruce Bvuma, osadlale umdlalo owodwa wobungani (Macufe Cup) selokhu ebuye ekulimaleni, bese kuba wumfana omncane ongakaze avimbe esikimini esikhulu uBontle Molefe.
Lesi simo singaholela ekutheni iChiefs ifike emdlalweni weSundowns idlalise uBvuma noma uMolefe kuphela. Ukugwema lokhu uMiddendorp kumele anqume ukuthi uyaqhubeka noBvuma kwiTelkom Knockout noma amdonse ngendlebe ukuthi azigade.
Izolo, uVina Maphosa weChiefs uqinisekisile ukuthi uKhune ulimale inyonga okungamhlalisa amasonto acela kwayisishiyagalombili engadlali. Ngemuva kokungadlali izinyanga eziyisishiyagalolunye, uKhune ubuye emdlalweni iChiefs ewudlale naMaZulu lapho edlale khona kahle. Umdlalo ulandelwe oweBaroka FC okuyiwona angazange awuqede uKhune.
UMiddendorp namanje usawukhomba kuye umunwe ngokujaha uKhune kodwa futhi uzithethelela ngokuthi ubengeke akuthole ukuphumula kubalandeli ukuba umbeke ebhentshini.