Amambuka ayangicindezela: Zuma
OBENGUMENGAMELI, uMnuz Jacob Zuma, ukhale ngamambuka amcindezelayo ngesikhathi ekhuluma nesigejana sabalandeli bakhe ngaphandle kweNkantolo eNkulu yaseMgungundlovu izolo emuva kokuhlehliswa kwecala lakhe lenkohlakalo eliphathelene nokuthengwa kwezikhali.
UZuma uthe amambuka, ayekhona nakudala, asekhona namanje yingakho kukhona nengoma kamasikandi ethi asemaningi kakhulu amambuka.
“Amaxoki asemaningi kakhulu kuthi angibulale elinye kodwa ngiyadlala maxoki ngeke ngize nginibulale,” kusho uZuma.
Uthe uzolulwa udaba lwecala lakhe kuze kugcine kwenziwe ubulungiswa.
UZuma ubonge abalandeli bakhe ngokuhlale njalo bemeseka.
“Angifuni ukusho izinto eziningi ngoba kukhona le nto ethi akumele ukhulume ngodaba oluphambi kwenkantolo,” kusho uZuma.
Uthe ukuba khona kwabalandeli bakhe kumqinisa idolo.
Izolo bekukhona isigejana sabalandeli bakaZuma abebengafikile ngisho ku-150, ngaphandle kwasenkantolo emuva kokuthi kube nokuthi kuhoxiswe amabhasi abesuka esifundeni iMoses Mabhida naseThekwini obekumele athuthe abantu.
UMfundisi Vusi Dube uthe bathukuthele bayaveva ngokuhoxiswa kwamabhasi obekuhlelwe ukuthi athuthe abalandeli bakaZuma.
Uthe balale bazi ukuthi amabhasi akhona kodwa bathola ama-SMS izolo ekuseni ebatshela ukuthi amabhasi ahoxisiwe.
“EThekwini besilindele amabhasi awu-30, eMoses Mabhida khona besilindele awu-35. Ukungabikhona kwamabhasi kwenze ukuthi abantu abaningi bangakwazi ukuza enkantolo kodwa udaba sizolidlulisela kuNobhala we-ANC KwaZulu-Natal, uMnuz Mdumiseni Ntuli, ngoba thina sazi ukuthi amabhasi awomphakathi aqashwa inoma ngubani owadingayo,” kusho uDube.
Uthe bafuna ukwazi ukuthi ngubani othe akuhoxiswe amabhasi.
Icala likaZuma nenkampani eyakha izikhali yaseFrance iThales amangalelwe nayo, lihlehliselwe uFebhuwari 4, wonyaka ozayo okuwusuku okulindeleke ukuthi liqale liqulwe ngalo.
Izolo ithimba labameli baZuma lifake isicelo sokudlulisa isinqumo senkantolo sangoLwesihlanu lapho kuchithwe khona isiphakamiso sokuthi icala eselidonse iminyaka ewu-15, kuhoxiswe ukuthethwa kwalo.
Ukulalelwa kwesicelo sokudlilisa isinqumo senkantolo sokuchitha isicelo sabameli bakaZuma kulindeleke ukuthi kube noNovemba 22.
Umshushisi u-Adv Billy Downer izolo utshele inkantolo ukuthi uMbuso usukulungele ukuthi uqhubeke nokuqula icala.
Uthe ngonyaka ozayo nabamele iThales bazobe bekhona uma seliqulwa.
Kanjalo no-Adv Thabani Masuku wethimba labameli baZuma naye uthe kade bakulungela ukuthi icala liqulwe.