Bekushubile ezakwaMpisane zibambana
UBEDINWE egane unwabu umqeqeshi weReal Kings, uJoel Masutha emuva kokudlala ngokulingana kwezakhe neRoyal Eagles ngoMgqibelo emini.
IKings ne-Eagles babelane ngamaphuzu emdlalweni weGladAfrica Championship ophele ngo 2-2, eChatsworth Stadium.
Kucace bha ukuthi uMasutha ubeze kulo mdlalo ngezinkani, ewafuna ephelele kodwa waphoxeka sekungenzeki.
“Engikwaziyo nje ukuthi bekufanele sithole amaphuzu aphelele kwaphela. Angifuni ukugxila kunompempe ngezinqumo zakhe. Bekufanele sishaye amagoli kwaphela,” kusho uMasutha obengandi uma ephendula izintatheli, umbona ngisho ebusweni ukuthi akeneme.
Isimo besishubile emdlalweni. Isolezwe lifike abalandeli beKings bengakangeni enkundleni, beyinqwaba ngaphandle sekusele imizuzu ewu-15 umdlalo uqale.
Isolezwe lihoshe ngemithombo yalo ukuthi esinye sezikhulu ze-Eagles kuphoqeleke ukuthi sikhokhe imali elinganiselwa ku R45 000, ukuze kungene abalandeli beKings abawu900 enkundleni. Ithikithi lilinye lomdlalo belingu R50. Bekukhona nonogada abebegaxe izibhamu ezinkulu nezincane, kucaca ukuthi bayimpi begade uShauwn Mpisane nendodana yakhe u-Andile.
Bekuthi nxa iKings ilibeke enethini, uShauwn ajabulise okwengane, agxumagxume ubone ukuthi uyakitazeka. Bekukhona namakhamera ethelevishini abelokhu emlandele njalo.
“Ngeke ngithi bekuwumdlalo lo ebekumele siwunqobe noma yikanjani kodwa sakhe amathuba, obekumele siwasebenzise. Angineme neze ngalokho,” kuqhuba uMasutha.
Umqeqeshi we-Eagles, uMorena Ramareboli uthe weneme ngalo mphumela kwazise usaziphembela isikwati sakhe.
“Uma usakha iqembu kunezinto okumele uzamukele futhi uziqonde. Abadlali abasha laba engidlala ngabo. Sizama ukwakha into enhle nomoya wokuzwana. Yingakho ngithi ngiyalamukela iphuzu. Emidlalweni embalwa kusuka manje, uzocaca umehluko ngoba sisebenza kanzima ukuthi sibumbe iqembu,” usho kanje umqeqeshi.
Akuyona into efihlwayo ukuthi umndeni wakwaMpisane wehlukene phakathi njengoba uSbu nomkakhe uShauwn beyinkukhu nempaka ngenxa yezinkinga zomshado wabo.
Indodana yabo u-Andile, iqhamuke enkundleni iqimbile ngenhla, ihlinile, igadwe yizinsizwa ebezihlome ngezibhamu.
Uyise uSbu, ubezihlekela nezinye izikhulu zamanye amaqembu ebhola, enamancoko kungathi akonakele lutho.