Umphakathi osukhathele ubulale amaphara
SIMUNCU isimo eLovu ngaphandle kwaseThekwini kulandela ukubulawa kwababili abashaywe umphakathi ubasola ngokuba amaphara abesehluphile endaweni.
UMnuz Mpho Mzwilile noSkhumbuzo (isibongo sakhe engikhatholakalanga), kuthiwa babulawe ngeledlule amalungu omphakathi abashaye baze bashona besolwa ngokweba.
Omunye wesithathu kuthiwa ushaywe kakhulu, waze waquleka. Kuthiwa umphakathi ubuzitshela ukuthi naye ushonile. Uphuthunyiswe esibhedlela sekufike amaphoyisa wafike waphaphama. Isolezwe lithole ukuthi isimo simanzonzo kule ndawo njengoba umphakathi ukhala ngokuntshontshelwa nokungasizakali amaphoyisa. Lo mphakathi kuthiwa usukhethe ukuziqaphela wona isimo endaweni, ukuze uzoqeda wonke amaphara endaweni. Ilungu lomphakathi elicele ukungadulalwa likhale ngokuntshontshelwa.
“Kunemizi oselokhu kuqale unyaka isigqekezelwe kathathu lapho akukho ukusizakala. Amaphara axakile kule ndawo njengoba kushaywe lawa amathathu kwashona amabili,” kusho ilungu lomphakathi.
Usihlalo wekomiti lokuphepha kule ndawo, wale waphetha negama lakhe, wathi njengoba enesandla esiqinile igama lakhe akumele livele noma ikanjani emaphepheni.
“Sinenkinga enkulu kule ndawo yamaphara, sintshontshelwa mihla namalanga. Esikufunayo ukuba siqede lesi sihlava endaweni ukuze kuphephe. Isimo simbi kabi endaweni. Abantu abasakwazi ukulala bakhululeke ezindlini zabo. Inkinga enkulu nasesiteshini bakhala ngokushoda kwamaveni okusebenza. Sidinga ukuba nesiteshi sethu lapha eLovu. Asiphephile nhlobo,” kusho usihlalo.
Laba abathathu abashayiwe kunama-video okuthiwa aqoshiwe lapho laba bebezivumela bona izinto abebezenza emphakathini, okunye bakwazi ukukulanda lapho base bekudayise khona.
Okhulumela amaphoyisa KwaZuluNatal, uColonel Thembeka Mbele, ukuqinisekisile ukuthi baphenya amacala okubulala amabili esiteshini KwaMakhutha. Unxuse nomphakathi ukuba ungaziphindiseleli kwabasuke besolwa ngamacala obugebengu.