Ungenisile owamabhayisikili ezikoleni
UZISHAYA isifuba ngosekwenziwe yiKwaZulu-Natal Cycling umqeqeshi emdlalweni wamabhayisikili.
USiphelele Dlamini ongumqeqeshi ovumbulula amakhono ngaphansi kwale nhlangano, uthe kuyamjabulisa ukuthi eKZN sezingaphezu kuka36 000 izingane zabamnyama esezijoyine lo mdlalo.
Uthe lapha ubala kuphela ezihlala ezindaweni zasemakhaya nasemalokishini.
UDlamini waseHammarsdale, eThekwini, uthe okunye okumjabulisayo ukuthi nakuba kungakapheli isikhathi eside beqale uhlelo lokuvumbulula amakhono kodwa sebefake umdlalo ezikoleni eziningi.
“Nakuba ngazi ukuthi luselude ukhalo kodwa ibanga esesilihambile liyathokozisa. Isifiso sami ukubona sikhula isibalo sezingane ezimnyama ezingena kulo mdlalo. Akuwona owabelungu kuphela. Mayelana nokubiza kwezinto zokuwudlala, abazali abangakhathazeki ngoba ezikoleni nasemphakathi sifika nazo zonke izinsiza. Siqeqesha izingane kuze kuyoshaya ezingeni lomhlaba. Kuphinde kungithokozise ukuthi sesikhiphe inqwaba yezingane emikhubeni engasile ngomdlalo wamabhayisikili,” kubeka uDlamini.
Uveze nokuthi iTheku selikhiqize abadlali ababili asebedlala esigabeni sikazwelonke, esibizwa ngeHigh Perfomance Riders.
Laba bagibeli bamabhayisikili, uThabiso Zindela oshova kwiUnder 17 noThabiso Shange oyibambe kwi-Under 15.
Lo mqeqeshi uthe ngonyaka odlule uZindela ugile izimanga ebuya nezindondo zamagolide eziyisikhombisa kwiSouth African Track Bike Championships, okuwumqhudelwano wamabhayisikili awuchaza ngokuthi unzima njengoba ibhayisikili lakhona lingenawo amabhuleki.
UShange no-Unathi Nxumalo emqhudelwaneni obuseCape Town bahlabene ngegolide elilodwa umuntu emunye.
UDlamini uthe ngenxa yokushaya kwasani, uZindela ofunda Elangabini High School, noShange ofunda e-Isibukosezwe Higher Primary School, eHammarsdale sebegixabezwe wuMyango wezeMidlalo ngemifundaze. Uthe ngenxa yokuthi ezikoleni abafunda kuzo akukhokhwa, uxhaso balusebenzisa ekuthuthukiseni ikhono labadlali.
Ucele izingane zamantombazane ukuthi zingahambeli kude nalo mdlalo. Uveze ukuthi ziyisikhombisa manje esezishova ezingeni eliphezulu. Enye yala mantombazane ngu-Anele Khoza.
Umqeqeshi ubonge wanconcoza eMnyangweni wezeMidlalo ngokugixabeza iKZN Cycling ngoR6.5m.
Uthe umqhudelwano olandelayo abaya kuwo iTour Durban Cycling Race ezoba ngo-Ephreli 28.