Umsubathi uswele imali yokuya phesheya
UKUSWELA imali komsubathi waKwaZulu-Natal kungase kushabalalise iphupho lakhe lokuyomela iNingizimu Afrika kumaParalympics azoba ngonyaka ozayo eTokyo, eJapan.
UQiniso Mhlongo waseNtuzuma, eThekwini, odlala i-high jump ne-long jump kwiT46 uthe kuduma upotiyane kuye njengoba engazi ukuthi uzoya ngani emqhudelwaneni ozoba seGermany ezinyangeni ezimbalwa ezizayo.
Lo msubathi, owalimala esandleni sesokunxele, ucabe indlela ebheke eTokyo egxuma ibanga elingu-1.5m kwiHigh Jump nelingu-4.90m kwi-long jump kumaKZN Championships. Ube esedlulela emqhudelwaneni kazwelanke obuseCape Town.
Kwi-long jump ugxume ibanga elingu-5.29m wase enza elingu1.60m kwi-high jump. Ngokugxuma leli banga kwi-high jump uzifake
ohlwini lwabangase bafakwe eqenjini eliya kumaParalympics nasemqhudelwaneni womhlaba ozoba ngawo unyaka ozayo.
ISouth African Sports Confederation and Olympic Committee (SASCOC) ibithe u-1.50m ibanga okuhlungelwa ngalo ukuya kule miqhudelwano.
UMhlongo oqale ukugila izimanga esafunda eSiyathuthuka High School, uthe usanda kuthola incwadi evela kwiSouth African Sport Association for the Physically Disabled (SASAPD) nakwiSASCOC ethe kumele ayohlungela ukuya eTokyo okokugcina ngomqhudelwano ozoba eGermany.
“Kuyimanje ngiphuma ngiyangena eminyangweni eyahlukene ngizama imali yokuya eGermany. Nokho bakhona abathembisayo, inkinga ukuthi basazithulele. Uma kugcina ngokubheda sengithembele kwiKZN Disability Sports. Ngicela nosomabhizinisi bangisize ukuze ngifeze iphupho lami,” kubeka uMhlongo.
Kuvela eleKZN DASSA nje, ngoLwesihlanu ixhaswe uMnyango wezemiDlalo ngoR1.5 million. UMhlongo ozicija ePrime Human Perfomance Institute, eMoses Mabhida, uphinde waveza ukuthi umatasa uthungatha umqeqeshi njengoba esanda kushiywa uMuhhamad Ali obeqashwe iKwaZulu-Natal Athletics (KZNA). Lo mqeqeshi obesebenza emanyuvesi aseCape Town kuvela ukuthi uhanjiswe izinkinga ezikhungethe le nhhlangano.
Ichaza ngokulimala kwayo le nsizwa engeyokugcina ezinganeni eziyisikhombisa, ithe yalimala isemsebenzini ngo-2011. Ithe yahlala izinsuku iqulekile. Uthe lokhu kwacishe kwamthikameza nasemqondweni njengoba wayesekhohlwe nokuthi angobani amalungu omndeni wakhe.
Kwezemidlalo uthe uze wabuyela ngo-2016 awuchaza njengonyaka wezimanga njengoba efike washaya kwasani kwabakhubazekile ezingeni lesifundazwe nakwelikazwelonke.