IBlitzbokke ingavuswa yisibhaxu saseDubai
UKUSHAYA udaka kweBlitzbokke ngeledlule emlenzeni waseDubai weHSBC World Sevens Series, kungase kube yisona yisizathu ebesidingwa yileli qembu ukuze lizofika kowasekhaya umlenze eKapa linesilonda nomfutho wokulungisa amaphutha.
Lawa ngamazwi enkakha yaleli qembu ezobe ivalelisa uRosko Specman. USpecman uzobe edlala okokugcina kuleli qembu elizobe lidlala ngejezi elihlukile ukugubha iminyaka eyikhulu kwazalwa uNelson Mandela owayengumengameli waseNingizimu Afrika.
Ngokujwayelekile iBlitzbokke iqala ngenothi eliphezulu eDubai. Kulokhu leli qembu liqede lisendaweni yesithupha kodwa uSpecman uyakujabulela lokho.
IBlitzbokke iyona evikela isicoco salo mqhudelwano kodwa indlela eqale ngayo ukusivikela yenze abaningi bazibuza imibuzo.
NgokukaSpecman, okuyikona okudingwa yiBlitzbokke ukuqinisekisa ukuthi bayawudla lo mlenze ngoba uma bengakwenzanga lokho bayobe baphoxe iKapa ehlale iphume ngobuningi ukuzokweseka leli qembu. Liqhathwe neSamoa, Zimbabwe neNew Zealand (ezobe ivikela isicoco somlenze waseKapa).
“Abathandi bombhoxo eKapa bahlale njalo belindele okukhulu kithina ngakho-ke siya kule mpelasonto sazi kahle ukuthi akukho okuzobe kushintshile. Njengoba eKapa sihlale senza kahle, nakulokhu sihlele ukwenza okufanayo kodwa konke lokhu kulele kithina singabadlali. Sicindezelekile impela ukuthi senze kahle kodwa kumnandi kithina lokhu ngoba kusikhuthaza nakakhulu,” kusho uSpecman.
Ngokusho kwalo mdlali osezoya kodlala kwiVodacom Super Rugby ngaphansi kwamabhuku eVodacom Blue Bulls, konke lokhu kulele ekutheni bona bengabadlali bakuthatha lokhu kucindezeka ngayiphi indlela.
“Siqale kabi kakhulu. Siphoxile. Indlela esiqale ngayo le sizini ayisiphethe kahle kwathina. Okumnandi ukuthi asidikibele kanti nabaqeqeshi bayasho ukuthi lokhu kuqala kabi, kungenzeka kube yikhona okusivusa emaqandeni. Okumnandi kithina ukuthi yize sisekhaya kodwa abalindeleke ukuthi benze kahle iNew Zeland ne-USA ngoba vele yibona abadlale kahle eDubai. Okuhle nje ukuthi siyazi singabadlali ukuthi kwakhona eDubai kunezikhathi lapho kucacile ukuthi uma sizimisele ngokugcwele alikho izwe elingamelana nathi. Sihlele ukwenza lokho eKapa,” kusonga uSpecman. Isiyonke eyeBlitzbokke eKapa imi kanje: NgoMgqibelo South Africa v Samoa (12.27pm) South Africa v Zimbabwe (3.48pm) South Africa v New Zealand (7.56pm)