Kwelulekwe abesifazane ngengqephu
KUGQUGQUZELWE abesifazane ukuthi babhekisise ukuthi bagqoka izimpahla ezibafanelayo uma beyothungisa.
Umsiki wengqephu we-Afrolicious Designs, uNksz Mamsie Mkhwanazi, ucobelele abesifazane abebehambele Intandokazi Women’s Club ngokubaluleka kokuzibhekisisa izimpahla abafuna ukuzigqoka.
Uthe abantu bavame ukubona izingubo abazithandayo zigqokwe abathile bese bephuthuma beyozithunga kodwa zivele zingabafaneli ngale ndlela abasuke beyilindele.
Weluleke abantu besifazane ngokuthi babe nabantu abababhekayo abami ngendlela efanayo nabo abagqoka izimpahla abazithandayo bese besika iphethini kulabo bantu.
Uphinde wacobelela abesimame ngezindlela zokugqoka wathi abantu bangakwazi ukugqoka izimpahla ezizodwa emicimbini engafani.
Wenze isibonelo ngomuntu osuke eya emngcwabeni ekuseni kodwa ebe enomcimbi okufanele aye kuwona emuva komngcwabo kodwa engeke akwazi ukuqala ekhaya.
Weluleke abesifazane ngokubaluleka kokwenza umsebenzi abawuthandayo bese besebenza kanzima kuwona.
Uthe akaqalanga engumsiki wengqephu kodwa waqala edwebela abasiki bengqephu izingubo kodwa naye wasebenza kanzima ukuze afinyelele lapho ekhona.
“Ngiqale ngidwebela abantu abathungayo izingubo kwase kufika omunye umama engangimdwebela wangeluleka ukuthi ngifundele ezemfashini ngoba ethi zonke izingubo engimdwebela zona ziyawina uma sekunemincintiswano,” kusho uNksz Mkhwanazi.
UNkk Zanele van Zyl, ongumpheki kwaSpekko, ucobelele abesifazane ngezindlela zokwenza ukudla okulula kulo Khisimusi njengoba ebakhombise ukwenza isaladi elithakwe ngerayisi, i-aphula, i-yoghurt nama-raisins.
UNkk Sonto Shalofu, ongomunye wabesifazane abalokhu baqala ukuhambela Intandokazi kusukela isaqala, uhlomule ngezipho okubalwa kuzo i-voucher yokulala ubusuku obubili eSibaya Lodge.