Injabulo kowePMB ebizwa kwiBafana
NGEKE nangengozi alithathe kancane ithuba alinikwe umqeqeshi weBafana Bafana, uStuart Baxter, umdlali wasesiwini weMaritzburg United uFortune Makaringe obizelwe esikwatini esihlangane izolo ngaphambi kokuthi kuqale amalungiselelo omdlalo wokuhlungela i-Afcon neNigeria ngoMgqibelo.
Ukusho lokhu ngoLwesihlanu ebusuku beqeda ukucazelana amaphuzu neHighlands Park emdlalweni we-Absa Premiership ophele kuwu 2-2 eMgungundlovu.
UMakaringe usezakhele olukhulu ugazi kubathandi bebhola baseNingizimu Afrika kusukela esuke kwiMoroka Swallows ngaphambi kokuqala kwesizini ka-2014/2015 wajoyina iTeam of Choice.
Lo mdlali ogcine ukubonakala kwiCosafa edlubhe ezeBafana, ubonga abaqeqeshi bakhe ngokumkhulisa osekuholele ekutheni uBaxter abuke ngakuyena. Uthe akayele ukuyokwandisa isibalo kwiBafana kepha uzozama ukukhonka indawo yakhe kuleli qembu lesizwe.
“Ngijabulile kakhulu ukuthi ngiphinde ngabizwa. Lokhu kuwubufakazi bokuthi ukuzimisela kuyasebenza futhi kunomvuzo. Ukwenza kahle eqenjini nakho kuyasebenzelana. Kuyahlekisa ukuthi lezi zindaba ngitshelwe ngazo umakhelwane wami ngoba bengingenalo ucingo ngalolo suku (ubeluwisile ucingo lwakhe luyolungiswa). Ngizwe ngabantu sebengibongela ngingazi okube yinto emnandi ngoba ngithe uma sengilutholile ucingo lwami kwase kuyangicacela,” kusho lo mdlali. Ngokusho kukaMakaringe ukubizwa kwakhe kuqondane kahle ngoba kuyiphupho lawo wonke umdlali ukumela izwe lakhe.
“Ngiyomela izwe lami ngakho lokho kwanele kimina. Kuyangikhuthaza lokhu okwenzekile futhi ngifisa ukuthi kukhuthazeke nabanye. Ngiwulungele lo mdlalo futhi kuyadingeka ukuthi ngiwulungele. Asizange sibizelwe ukuyokwandisa isibalo kepha silandelwe ukuyokwenza umsebenzi. Kunabadlali (beBafana) abalimele abebenza kahle esikhathini esedlule ngakho lokhu kuwumthwalo omuhle wokuthi sifune ukwenza kahle. Njengoba bengekho kumele senza kahle,” kusho yena.
UMakaringe uthe akufanele isatshwe iNigeria ngoba bonke abadlali abazobe bedlala (kuyona) bayafana nalaba abazobe bekwiBafana. “Ngeke sibayele ngobuso ngoba sibhekwe ukuthi silifake iqembu kwi-Afcon. Badlala emaqenjini adumile umhlaba wonke kodwa konke lokhu kuyisinongo sokuthi siye kulo mdlalo sazi ukuthi siyobhekana nani, sizimisele nakakhulu. Ngeke nangengozi ngiliyeke leli thuba. Sidlala kahle kwiMaritzburg ngakho-ke kusemqoka ukuthi siqhubeke nokuzimisela,” kusho uMakaringe. ■Khonamanjalo izolo kuqinisekiswe ukuthi iBafana izobhekana neParaguay emdlalweni weNelson Mandela Cup ngoNovemba 20 eMabhida Stadium, eThekwini, ngo-7 ebusuku.