Kukhale izembe kubaqeqeshi bawePSL
UPHIKA eyokusula obengumqeqeshi weBlack Leopards, uJoel Masutha, okuvele izolo emini ukuthi akasekho kuleli qembu laseLimpopo.
ILeopards ibhale ekhasini layo ku-twitter yathi “UJoel Masutha usesulile namuhla (ngoMsombuluko) njengomqeqeshi weqembu”.
Lesi sitatimende okuthiwe sikhishwe okhulumela iqembu uBerry Ramunenyiwa asizange sichaze okuningi.
Ngesikhathi Isolezwe lithinta uMasutha ukuthola ngezizathu ezimenze wasula, uthe: “Amanga ukuthi ngisulile. Bona bangibizile bangitshela ukuthi abajabule ngomsebenzi wami. Sibe sesikhuluma sasayina isivumelwano (ngezimfanelo zakhe). Ngokwami lokhu kube yisinqumo esithathwe yizinhlangothi zombili ngokuvumelana. Phela uma usula uwena oya kumqashi usho ukuthi hhayi usuyashiya.”
Uthe akananxa namuntu ngokuthi useshiyile eqenjini.
“Yinto eyaziwayo ebholeni ukuthi izinto ezifana nalezi ziyenzeka uma ungawini. Kumele kube khona izinguquko. Nginokuthula (ngokwenzekile). Sengiqalile ukufuna umsebenzi,” kusho uMasutha.
Uthe akakhethile uwubheke noma ikuphi, kwiNational First Division (NFD) nakhona kwiPremiership.
Uthe akazisoli ngebhola ebelidlalwa yiLeopards ngaphansi kwakhe.
“Nalapho engizothola khona ngizofike ngidlalise ibhola elifanayo,” kusho yena.
ILidoda Duvha inconywe kakhulu ngokudlala ibhola elidla phansi kwiNFD ngesizini edlule. Igcine ikhushulelwe kwiAbsa Premiership naye uMasutha ngemuva kokunqoba imidlalo yokuhlunga.
Nokho ifike esigabeni esikhulu yakuthola kunzima ukuvimba izitha. Ingenelwe amagoli awu-17 emidlalweni ewu-12, okuyisibalo sesibili esiphezulu.
Ihleli endaweni ka-14 ngamaphuzu ayisishiyagalolunye. Ngempelasonto ibhaxwe yiCape Town City ngo 3-1 eKapa.
Usuku lwayizolo belulubi kubaqeqeshi njengoba ntambama noLuc Eymael eqinisekise ekhasini lakhe ku-twitter ukuthi usebone afika ngayo kwiFree State Stars. IStars iyavuzisa emuva njengoba isingenelwe amagoli awu-18. Ihleli endaweni yesishiyagalolunye kwi-log ngamaphuzu awu-14.
U-Eymael odabuka eBelgium uqophe umlando enqoba iNedbank Cup neStars ngesizini edlule.
Kushone elayizolo sekunemibiko yokuthi u-Eymael uyenza ozothatha izintambo kwiLeopards.