Uphenyo ngowesifazane oshone ebeletha nosana
UMNYANGO wezeMpilo KwaZulu- Natal uphenya ngokushona kowesifazane (30) nengane yakhe ngesikhathi ebeletha esibhedlela Ekombe, phakathi kweNquthu neNkandla.
Izolo uNgqongqoshe wezeMpilo uDkt Sibongiseni Dhlomo uthe sebeqale uphenyo ngesigameko sokushona kwalo wesifazane nosana lwakhe.
Uthe isigameko senzeke ngoLwesibili emasontweni amabili edlule ngesikhathi owesifazane ebeletha.
“Owesifazane ubelethe ingane yazalwa isishonile naye washona ngenxa yokopha ngokweqile khona esibhedlela ngezimo esingagculisekile ngazo. Kusolakala ukuthi akazange athole izinga elifanele lokunakekelwa ngokwezempilo ngesikhathi ebeletha,” kusho uDhlomo.
Uthe uma kukhona abatholakala benecala ophenyweni bafuna ukuthi bajeziswe ngendlela efanele.
UDhlomo uthe bazama ngayo yonke indlela ukuqinisekisa ukuthi abantu besifazane ababelethayo babeletha kwizimo ezifanele neziphephile.
Ngokusho kwakhe amazinga okushona komama bebeletha ayaqhubeka nokwehla kodwa zisakhona lezo zigameko zabenza ngendlela engafanele bese bedicilela phansi umsebenzi wabanye. Ubale lesi sigameko njengesinye sazo.
Ukhuluma kanjena nje umbiko wakamuva okhishwe yiSouth African Medical Journal (SAMJ) uveza ukuthi elakuleli lenza kangcono ekwehliseni amazinga okushona komama bebeletha ezibhedlela zikahulumeni. Ngokwalezi zibalo ehle ngo-29% amazinga okushona komama bebeletha phakathi kuka-2009 no-2016.
Khonamanjalo, uDhlomo uveze ukuthi akulona iqiniso ukuthi igciwane okuthiwa litholwe abathile abebehambele indawo yokudla eseThekwini, i-salmonella, libhedukile kulesi sifundazwe. Uthe abantu abathile nje abebesendaweni yokudla okutholakale ukuthi bathole leli gciwane base belashwa esibhedlela esizimele. Uthe bayafisa ukuthi ziqiniswe izinhlelo zokuhlolwa kwezindawo ezidayisa ukudla. Unxuse nalaba abenza ukudla ukuthi baqaphele ukuthi bahambisana nemigomo yenhlanzeko ngaso sonke isikhathi.