‘Kufe 1 300 wezingane ezingozini’
ABEZIMO eziphuthumayo bathi sebeqinisa izinhlelo zabo zokuqeqesha nokusiza ngendlela ehlukile izingane njengoba umbiko wangonyaka odlule uveze ukuthi zingu-1 300 ezife ezingozini zomgwaqo.
Ucwaningo lwenziwa yiChildsafe ohlelweni lweUnicef olubizwa ngePrevention of Road Injuries Impacting Children in South Africa (PRICSA).
Oyimenenja yegatsha kwaER24 eVaal, eGoli, uMnuz John Ramcharan, uthe izingozi eziningi ezenzeka phakathi nezinsuku kusuke kukhona kuzo imindeni nabafundi abagibela ematekisini.
Uthe ngezimpelasonto ezingozini kusuke kukhona imindeni nezingane. URamcharan uthe uhhafu wezingozi abasuke bebizwe ukuyosiza kuzo kusuke kukhona izingane.
Uveze ukuthi yize abezimo eziphuthumayo beqeqeshiwe ukusiza abalimele, kunzima ukusiza izingane kunabadala.
“Isikhathi esiningi abasebenzi bezimo eziphuthumayo nabo bazele, banezingane. Kunzima ukubona ingane ilimele ngoba uvele ucabange eyakho. Awugcini ngokuba wumsebenzi kodwa uyathinteka kakhulu emphefumulweni, kudingeka ubhandishe uphinde ududuze. Kuyenzeka kudingeke usebenzise isipiliyoni sokuba wumzali kwezinye izimo ngoba ufika kunengane enezinyanga eziyisishiyagalombili noma enonyaka ilimele,” echaza.
Uthe isikhathi esiningi izingane yizona ezithuka kakhulu uma kwenzeka ingozi futhi kufanele zilashwe ngendlela ehlukile. Uchaze nokuthi uma befika zisuke zikhala, zibuza nabazali bazo. “Kuyenzeka umzali angabi seduze, thina bezimo eziphuthumayo kudingeka siziduduze njengabazali. Kumele nendlela okhuluma ngayo esigamekweni yehluke uma usiza ingane, wehlise umoya ukuze ingasabi. Kumele ulokhu ukhuluma uchaze ngosizo olunika ingane ukuze yehlise umoya, ikwethembe,” kusho uRamcharan. UMnuz At Grobler oyiTrauma Coordinator kwa-ER24 ugcizelele ukuthi kulula ukuthi ingane isheshe imethembe umuntu oyisizayo uma ekhombisa ububele. Uthe izingane zihlakaniphile ziyakwazi nokufunda umqondo womuntu.
UNkk Yolande Baker, onguMqondisi omkhulu kwaChildsafe SA, uthe isikhathi esiningi ezingozini okulimala nokufa kuzo izingane kusuke kukhona ukushayela budedengu.
“Izingane zibulawa abashayela budedengu nabanejubane emgwaqweni. Abanye bashayela bephuzile, bese kufa izingane,” kusho uNkk Baker.