Ngincoma umsebenzi weSiyaphambili Qondile Home Based Care
MHLELI: Ngithi ake ngithulele isigqoke inhlangano yomphakathi engayenzi inzuzo eJozini ngasenxanxatheleni yezitolo iJozini Mall eyasungulwa umama uGumbi kudala kodwa namanje isamile ekusizeni abantu ikakhulukazi abakhubazekile iSiyaphambili Qondile Home Based Care.
Into engenza ngibonge lo wesifazane ngubuhlakani aba nabo ekusunguleni inhlangano esiza ngezidingo zabantu abaswele ikakhulukazi abakhubazekile.
Ngike ngavakashela emahhovisini abo ngafica impela kumanzi phansi njengoba bekuqeqeshwa abakhubazekile befundiswa ngokubambisana neMfolozi FET College.
Ngijabulile ukubona ukuthi kukhona abantu abalula isandla emphakathini hhayi ngoba bebheke inzuzo kodwa bekwenza ngokwethembeka.
Ngiyafisa ukuthi uma laba abaqeqeshwayo sebeqedile uqeqesho kube khona ukuhlangabezana neMeya yethu yaseJozini uMnuz Delani Mabika ukuze bathole okuzoba ngamathuba omsebenzi noma babaqhubezele phambili ngezifundo kwazise iSiyaphambili Qondile Home Based Care lolu hambo isibaqalele.
Ngiphinde ngizicelele nje kulabo abacaphuna kuphinde kusale ukuthi basilule isandla balekelele le nhlangano ikakhulukazi ekuqedeleni amahhovisi ayo njengoba engakapheli kahle ukwakhiwa.
Nawo nje umphakathi waseJozini namaphethelo awusilule isandla bakuthumele kule nhlangano yomphakathi. Phela sibusisiwe isandla esiphayo.
Ngokubambisana nosomabhizinisi baseJozini, umkhandlu waseJozini oholwa nguMnuz Delani Mabika nabefundisi bethu bamabandla ahlukene lesi sakhiwo sizosiqeda ungakashayi uJuni wonyaka ozayo. Sbongeleni Myeni EJOZINI