Baxakekile abazali othisha beshemula abafundi benkolo yobuNazaretha
abanesihluthu ngaso kuwona wonke amakilasi. Kuthiwa ubengachazi izinto eziningi kodwa ubebatshela ukuthi bayawazi umthetho wokuthi abavumelekile ukuthi babe nezinwele ezingaphezu kwesentimitha.
Omunye wabazali onengane efunda eSiphumelele eshenyuliwe, uthe uphoxeke ngesenzo sikathishanhloko.
“Angazi ukuthi uthishanhloko ubengenelwe yini ngoba sekungunyaka wesithathu ingane yami ifunda kulesi sikole futhi ayikaze igundwe. Lesi sikole sinenqwaba yabafundi abangamaNazaretha. Ngisho bemukelwa kusona bayabuzwa ngenkolo yabo,” kusho unina womfundi.
Uthe uyile esikoleni eyobuza uthishanhloko ngalento ayenzile kodwa wathi izingane azibukeki zihlanzekile uma zinesihluthu.
Umshumayeli wasethempeleni iHlalane, kwaFelekisi, eManzimtoti, uMnuz Mbuyiselwa Gcwensa onengane exoshelwe isihluthu eMbambangwe, uthe sekuphele unyaka ingane ihlukunyezwa.
“Ingane iqale ukuhlukunyezwa nyakenye kuthiwa ayigunde, uma ithi iyiNazaretha, uthishanhloko uyigcona ngokuyibiza ngoNyazi. Kulokhu uyivimbe esangweni wathi ayingangeni nesihluthu esikoleni. Sekuphele isonto ingafundi,” kusho uMnuz Gcwensa.
UMnuz Willington Myeni womkhandlu olwa nokuhlukunyezwa kwamaNazaretha, iNazareth Judiciary Council (NJC) uthe kubukeka uMnyango wezeMfundo ukushaya indiva ukwephulwa komthetho ngoba othisha basazieshemula izingane, kodwa azikho izinyathelo abathathelwa zona. Uthe ziningi izigigaba zokushenyulwa kwabafundi abazibike kusukela ngo-2016 kodwa kakwenziwa lutho.
Okhulumela uMnyango wezeMfundo KwaZulu-Natal, uMnuz Muzi Mahlambi uthe bathumele abahloli ukuthi bayobheka udaba ngoba isekhula eyazisa othisha ukuthi bangabashemuli abafundi yakhishwa ngo-2016.
“Akekho uthisha okumele aqhubeke nokushemula izingane. Abaningi abawephuli umthetho kodwa kunemithonseyana esaqhubeka. Umthethisisekelo uvumela abantu ukuthi balandele noma iyiphi inkolo abayithandayo futhi usebenza nakubafundi,” kusho uMnuz Mahlambi.