Onesi abasithandisisi isiguli esivulela kakhulu emlonyeni
ISIZULU sisho kahle, sithi umlomo womuntu uyishoba lokuziphungela uma ebhekene nezinkinga, kodwa ngiyathanda ukuthi abantu bakhumbule ukuthi esibhedlela akathandisiswa umuntu onomlomo omanzi.
Okusempeleni kungcono umuntu azenze isimungulu kube sengathi akakwazi ukukhuluma kunokuthi ampempeze kakhulu kuze kuthiwe ubanga isicefe.
MaSolezwe ngicela nizithathe izeluleko zikaVolos ngoba kade ayephuma engena ezibhedlela, uma ethi onesi abasifuni isiguli esikhuluma kakhulu ngicela nikwamukele ngoba kuyiqiniso.
Bakwethu ngivumeleni ngithathe leli thuba nginazise ukuthi emhlabeni wonke jikelele, onesi abamfuni umuntu ongumachaza izifo.
Uma ufika esibhedlela okanye emtholampilo akufanele ufike uphaphe, uchaze ukuthi uguliswa yisifo esithile esihambisana nesifo esithile.
Umthetho wonesi abakufuni ukuchazelwa ukuthi umuntu uphethwe yini, uma uke wenza iphutha lokuthi uthi uchaza isifo sakho, bavele babizane bonke bakwenze ihlaya.
Kwesinye isibhedlela ngaze ngakhala onesi beqhwebana behlekisa ngami bethi: “Awusho-ke dokotela uMemela, njengoba uthi uphethwe ama-ulcer nje yini okufanele sikusize ngayo?”
Ukuhlekwa kwami ngibizwe ngodokotelambumbulu kwangenza ngaqonda ukuthi uma ugula akufanele uchaze isifo esikuphethe kodwa kungcono uthi kubuhlungu lana.
Ngiyazi abantu abaningi bazothi basuke bechaza ukugula kwabo ngoba kusuke kuyibona onesi ababuzile ukuthi baphethwe yini. Impendulo yalokho ithi onesi basuke bebuza ngoba begcina icala ukuthi umuntu uphethwe yini, okusho ukuthi basuke bebuza umbuzo abangayidingi impendulo.
Abantu besifazane bazomfakazela uVolos uma ethi onesi bacasuka kabi uma ufika uthi ukhulelwe, uma uke waqala inkulumo yokuthi ukhulelwe, bavele bakuhlome imibuzo enzima ethi ubone ngani ukuthi ukhulelwe.
Uma ufuna udaba lokukhulelwa kwakho luzwakale kahle konesi kufanele ukhulumele phansi uthi unokuzisola ngoba weqiwe yinyanga uzocela bakuhlole njengochwepheshe.
Ngisho sekuthiwa sekutholakele ukuthi ukhulelwe, lokho akusho ukuthi sekufanele batshelwe nguwe ukuthi sekuyinyanga yakho yokuxukuza.
Ngisho sekuthiwa sekuyinyanga yakho yokubeletha kufanele wazi ukuthi onesi abamfuni umuntu ovele aphaphe abatshele ukuthi useyabeletha. Uma ufika esibhedlela uthi uzwa ongathi uyabeletha bavele bakubuke bathi phinda ekhaya ingane isekude kabi
Okunye okubalulekile okufanele kwaziwe ngonesi wukuthi abakuthandi ukumenyezwa, bethi bengakuthandi ukumenyezwa, baphinde bangakufuni nokuthunywa.
Onesi bacasuka kabi uma isiguli simemeza sithi: “Nesi! Nesi! Ngicela ungibizele udokotela nakhu ngijuqwa yizinhlungu.”
Uma isiguli sithanda ukubiza onesi bavele bangasinaki bathi bayoze basibone uma sesehlise izinga lukuphapha.
OkaVolos uyaphinda uyanxusa ukuthi abantu bangalokothi bafike emitholampilo bacicelele izinto ezinjengamaDrip nemijovo ngoba onesi abakufuni lokho.
MaSolezwe ngivumeleni ngiphethe ngokuthi kuyo yonke imisangano ongayitshela onesi emtholampilo awukho obacasula owedlula owokuthi ufike nomuntu egula uthi ushaywe yinyoni.
Onesi bavele babiphe uma ubachazela ukuthi lo muntu ogulayo ushaywe yinyoni. Uthi usachaza bakubuze ukuthi uyibonile yini leyo nyoni othi imshayile? Baqhubeke bathi uma uyibonile inyoni imshaya, kungani ungayanga emaphoyiseni uyovula icala lomuntu olinyazwe yinyoni?