UMicho wexwayisa abalandeli ngokucindeza abadlali
UMQEQESHI we-Orlando Pirates,uMilutin “Micho” Sredojevic, uxwayisa abalandeli ngokucindeza abadlali abona kuholela ekutheni bangadlali ngokukhululeka.
UMicho ubephendula imibuzo emuva kokuba umgadli weZimnyama, uThamsanqa “Gandaganda” Gabuza, egcine ethole ikhadi elibomvu iPirates ihlula iBlack Leopards ngo 2-1 kowe-Absa Premiership ePeter Mokaba Stadium, eLimpopo, ngoLwesibili ebusuku.
UGabuza, onyamandambana kubalandeli beZimnyama, ubhiyoze wakhumula ijezi waliphonsela abalandeli waduba ukudlala emuva kokuthi ibhola lakhe lishayise umdlali weLeopards langena phakathi abalandeli bekade bemhhewula. Ubuye esebhandishwe idolo, esewumuntu olimele. Unompempe umnike ikhadi lesibili eliphuzi emjezisela ukungabi khona enkundleni ngaphandle kwemvume nokukhumula ijezi ebhiyoza.
UMicho uthe akathandi ukwenaba kakhulu ngoba okwenzekile kungaphezu kwabo njengethimba labaqeqeshi.
“Okokuqala sibahlonipha kakhulu abalandeli bethu, siphilela bona, iqembu elabo. Sibahlonipha sinjalo, ngifuna ukubatshela ukuthi akulula ukuba lapho sikhona, ukuba ngumqeqeshi nokuba ngumdlali ngoba kubhekwe izinto ezinkulu. Nathi singabantu. Ukweseka okuncane eqenjini kungamukeleka. Kufanele bazi ukuthi uma becindeza iqembu noma abadlali abathize, bayabopheka. Lokho kuholela emaphutheni, ukuhlulwa amathuba nokutatazela nokunye okwenza singadlali ngendlela efanele,” kusho uSredojevic.
“Siyakholwa wukuthi ngokusibekezelela nokweseka iqembu, singenza kangcono futhi sizokwenza okungcono. Eminyakeni ewu-25 ngiqeqesha, angikaze ngiyibone into enjena. Kodwa empilweni akufanele uthi ngeke kwenzeke ngoba kukhona usuku lokuqala kuyona yonke into. Kwenzekile kodwa ngeke sikwenze ihaba. Sisifundile isifundo, kufanele sizame ukubhekana nakho ngendlela engcono ngokuzayo.”
Emasontweni edlule owayengumgadli weBanyana Banyana, uPortia Modise, ukhulume esidlangalaleni wathi angenza kangcono kunoGabuza. UModise ushaye amagoli angaphezu kuka-100 eqenjini lesizwe. UGabuza wakugwema ukuphikisana naye wathi akazi ukuthi ibhola labesilisa ungaliqhathanisa kanjani nelabesifazane.
Mayelana nomdlalo neLeopards uMicho uthe: “Sidlale ngesivuvu, sathola amathuba amane okuqeda ngabo emizuzwini ewu-10 yokuqala. Nakuba singalitholanga igoli ngaleso sikhathi kodwa asitatazelanga. UGabuza uphumile emuva kwegoli. Ngaphambi kwalokho ubekade ekhahleliwe ethangeni. Unompempe usebenzise umthetho wokuthi uphume enkundleni engamtshelanga, washiya ijezi phansi nobekusho amakhadi aphuzi amabili. Sidlale imizuzu ewu-60 sishoda, sibhekene neqembu elihle. Akulula kodwa abadlali bazinikele ngakho konke, sathola igoli lesibili ebelisifanele. Bekuzoba ngokunye ukuba besidlala siphelele.”
UKUHLUTHUKA nendelelo ekhonjiswe umgadli we-Orlando Pirates, uThamsanqa “Gandaganda” Gabuza, ngesikhathi eZimnyama zishaya iBlack Leopards ngo 2-1, ePeter Mokaba Stadium ngoLwesibili ebusuku, kukhulunywa ngakho nxa zonke eNingizimu Afrika.
Babodwa abasola lo mgadli ngokungalihloniphi iqembu lakhe, isigaba adlala kusona nabalandeli abakhokhayo bezombona enkundleni.
Okuqhathe abalandeli noGabuza wukuthi emizuzwini ewu-17 esiwombeni sokuqala kulo mdlalo we-Absa Premiership, ushwebe amathuba amane obekungoqekelele ebhekene nonozinti weLidodha Duvha uRotshidzwa Muleka.
Kulo mdlalo, uGabuza odabuka eMnambithi, ugcine ukubonakala ngomzuzu ka-33 egoba ibhola elihle elenze umkhonto wagwaza ekhaya kuThivhavhudzi Ndou oyisitobha seLeopards. Ngemuva kwalokho ubengasabambeki uGabuza njengoba ethathe ijezi lakhe waliphonsa kubalandeli bePirates, eshaya izandla ngokubhuqa, wabonga ukuthi bathi abamfuni wabe esenza abebekufuna abalandeli wabashayisa ngomoya waqonda ezindlini zokushintshela.
Bazamile ukumkhuza ozakwabo, nomqeqeshi uMilutin “Micho” Srodojevic kodwa kwanhlanga zimuka nomoya. Kungenzeka ukuthi ubuyile kancane umqondo kuGabuza engasekho enkundleni, nokuthe esiwombeni sesibili wazenza olimele wabuya kodwa unompempe wambuyisela lapho ephuma khona ngekhadi elibomvu.
Nakuba isenzo sikaGabuza singemukelekile kodwa bakhona ozakwabo okungabadlali abadlalela amaqembu ehlukene kwi-Absa Premiership abazwelana naye.
UJames Keene ongumgadli weSuperSport United ubhale ekhasini lakhe lika-Twitter wathi: “Ngiyamzwela uGabuza. Masonto onke uyazinikela eqenjini asize nozakwabo. Usesikhathini esinzima njengamanje ngakho njengabadlali kufanele simeseke ukuze abuyele esimeni esihle ngokomqondo. Ukuthi uyashweba noma akashwebi phambi kwepali akusho lutho ngoba naye uwumuntu. Kimina ungumdlali osezingeni eliphezulu okungamfanele ukuphathwa ngale ndlela.”
Omunye umdlali ophawulile kwi-Twitter wukaputeni weBafana Bafana neBidvest Wits uThulani “Tyson” Hlatshwayo.
“Uwumuntu naye. Bengazi ukuthi lokhu kuzogcina kwenzekile kodwa bengingakulindele ukuthi kwenzeke ngale ndlela. Uqine Gabuza,” ubhale kanje uHlatshwayo.
UMark “Proffessor” Mayambela odlalela iChippa United naye uhambe emazwini alaba bobabili ekhala ngesihluku abalandeli abasibhekise kuGabuza.
“Kubuhlungu ukungahlonishwa abalandeli beqembu olidlalelayo. Kwenza ukuthi ungakhuthazeki futhi uphuke nenhliziyo. Ukuthi uyageja noma akageji akusho lutho ngoba usebenza kanzima esebenzela iqembu. Akufanele ibhola libe nesihluku esinjena,” kusho uMayambela.
Kulindeleke ukuthi iPirates iphawule ngalolu daba kanti nePremier Soccer League (PSL) ingase imthathele izinyathelo uGabuza njengoba kubukeka sengathi isithunzi sebhola kuleli sihuduleke phansi.