ISace iphenya uthisha osolwa ngokucwasa
USENKINGENI obenguthisha waseWestville Girls High, eThekwini, ocwase abafundi abamnyama ngesikhathi kufundwa njengoba ephenywa ngumkhandlu olawula othisha iSouth African Council for Educators.
Lo thisha osule esikoleni ngoMsombuluko kuthiwa wabiza abafundi ngegama eliqala ngo-K ngesikhathi kufundwa incwadi eyayikhuluma ngomhlaba.
UMnuz Themba Ndhlovu, okhulumela iSace, uthe sebezwile ngalolu daba futhi bazoluphenya.
Uthe uma kwenzeka etholakala enecala angasulwa ohlwini lwabantu ababhalisiwe ukuthi bafundise eNingizimu Afrika.
“Noma esesulile esikoleni sizomphenya ngoba kungenzeka aphinde avumbuke kwesinye isikole. Uma kutholakala ukuthi icala lakhe linesisindo angasulwa ohlwini lwabantu abafundisayo,” kusho uNdhlovu.
Uthe uma usuliwe ohlwini yilo mkhandlu awukwazi ukuphinde ufundise nakwamanye amazwe asondelene nakuleli.
UNdhlovu uthe amacala athinta ukucwasa ngokwebala ngamanye aseqhulwini kwabawaphenyayo.
“Siwumkhandlu siwabeke eqhulwini amacala afuze lawa okucwasa. Ayafana nje namanye amacala esisuke siwabeke eqhulwini afana nothisha abalala nabafundi nabanye abasuke benze amacala anzima,” kusho uNdhlovu.
Uxwayise othisha ukuthi bangazenzi izinto bese bejaha ukusula emsebenzini ngoba bona bayaqhubeka nophenyo noma umuntu esesulile.
“Umuntu uma ejaha ukusula akusho lutho ngoba siyaqhubeka nophenyo siphinde simbambe. Nakulokhu yinto efanayo esizoyenza.”
UNdhlovu uthe kwesinye isikhathi uthisha uyakwazi ukuthola isigwebo esilengisiwe ukuthi angaphinde enze okufanayo.
Ngemuva kokuvela kwalolu daba baningi abafundi abaphumele obala bathi yinto eyenzekayo kulesi sikole bathi kade babecwaswa ngokwebala nangendlela ababukeka ngayo.