Ithala liqinise ithimba labasebenzi
ISIKHULU esiphezulu sebhange Ithala, uMnuz Danny Zandamela, siqinise ithimba labasebenzi bebhange ngokuqoka uNkk Delisile Mti ozoba yiNhloko yophiko lwezikweletu.
UNkk Mti, odabuka eNquthu KwaZulu-Natal, uthe umsebenzi wakhe wukubheka ingozi yezikweletu eThala, abale kukho ukulawula nokunciphisa ukubolekisa okungahlelekile nokuqinisekisa ukuthi imali ekweletiswa eThala iqoqwa ngendlela efanele.
UZandamela uthe akangabazi ukuthi uNkk Mti uzowenza ngokuzimisela umsebenzi wakhe ngenxa yolwazi namava anawo.
UZandamela usezinhlelweni zokuqinisekisa ukuthi Ithala lithola ilayisensi yokusebenza njengamanye amabhange amakhulu.
Kumanje Ithala linemikhiqizo ehlukene ebingekho kudala ngenxa yokuthi iBhange loMbuso livumile ukuthi ibe khona.
UNkk Mti unamava eminyaka ewu-21 esebenza emabhange.
Uthe ngaphambi kokuza eThala ubesebenza eFirst National Bank (FNB) nakhona ebhekele uphiko lwezikweletu. Ngaphambi kwalokho wayeseNedbank.
“Ngaphambi kokuza eThala bengiseFNB ngiyiNhloko yoPhiko lwezikweletu ngibhekele kakhulu izinkampani zikahulumeni namabhizinisi amakhulu. Lo msebenzi ngiwenze iminyaka eyisishiyagalolunye. Ngeza nomqulu onamasu okulawula izikweletu zezinkampani zikahulumeni nemigomo yokulawula yezezikweletu,” kusho uNkk Mti.
Uthe eqala ukusebenza ngo-1990 wayengumcwaningimabhuku eCoopers & Lybrand, wasuka lapho waya e-Afrox, wadlulela e-Absa waya naseSouth African Airways lapho wayebhekele ezokukhokhwa kwentela. UNkk Mti uneziqu zeMBA azithola eNyuvesi iHerriotWatt ese-Edinburgh, e-United Kingdom (UK), ezeBCom Honours azithola e-UNISA, ezeBCom azithola eNyuvesi yaseCape Town neze-Associate Diploma kwiBanking azithola eRapid Results College nayo eseUK.