Uyala intsha ukuthi ingesabi ukuyovula amabhizinisi
UGQUGQUZELE abantu ukuthi bangesabi ukulandela amaphupho abo uMnuz Njabulo Sithole ongumnikazi weBakers Creationz edayisa amakhekhe ayo ezitolo ezinkulu, ibe izinze eMaphephetheni.
USithole utshele Isolezwe ukuthi waqala iBakers Creationz esebenzela ekhaya ngoba wayengenayo indawo yokusebenzela.
“Ngisungule iBakers Creationz ngo-2014, amakhekhe okuqala engawabhaka ngawabhaka ngofulawa asesiwuthengele ukuwusebenzisa ekhaya. Nganginayo indawo yokusebenzela kodwa ngoba ngangithanda ukubhaka ngaqala kanjalo,” kusho uSithole.
Amakhekhe eBakers Creationz okungama-muffins nama-snowballs adayiswa ezitolo ezinkulu okubalwa kuzo oSpar, Pick n Pay Express, BP Express, Inanda Cash & Carry, Fedics nasezitolo zamagaraji akwaShell nawakwa-Engen.
Kumanje usanda kusayina isivumelwano sokudayisa amakhekhe kuzo zonke izitolo zakwaPick n Pay eNingizimu Afrika.
Ngesikhathi ekhula uSithole wayazi ukuthi ufuna ukuzisebenza hhayi ukuyoqashwa enkampanini ethile njengoba kwakwenzeka kwabanye ozakwabo.
Uthe emuva kuka-matric wenze iziqu zeBusiness Management neMarketing e-Oval College.
Emuva kwalokho uye e-United Kingdom (UK) lapho ebesebenza emkhakheni wokwenziwa kokudla.
“Ngesikhathi ngise-UK uthando lokusebenza ngokudla lwakhula kakhulu. Ngaqala ngafunda amabhuku okupheka, ngabuka nezinhlelo zokupheka.
Ngangipheka ukudla okumnandi kanti ngithe sengibuya ekhaya ngabona ithuba lokuthi ngivule elami ibhizinisi,” kusho uSithole.
Akaqalanga ngokuvula ibhizinisi ngesikhathi ebuya e-UK kodwa wasebenzela uWoolworths izinyanga eziyisithupha neMpilende Foods.
Ugqugquzele intsha ukuthi uma inikwa ithuba isebenze ngokuzikhandla ukuze iphumelele.
Emuva kwalokho wasebenzisana nozakwabo ababenza naye izinkwa ezibizwa ngeRoyal Bake kodwa lobu budlelwano baphela wase eqala iRoyal Creationz.
“Ngabheka ukuthi yini engingayenza emphakathini waseMaphephetheni, ngathola ukuthi amakhekhe ayadingeka. Ngacela indodana yami ukuthi ingidayisele amakhekhe esikoleni kodwa ayephela ingakafiki nawo esikoleni. Ngabhaka amaningi ngacela ezinye izingane zasendaweni ukuthi zingidayisele. Lokhu kwangisiza ngoba ama-oda ayengena sekukhona othisha ababefuna amakhekhe abazowadla emini, abanemicimbi babewathenga kimi njalonjalo,” kusho uSithole.
Uthe akudingeki ukuthi ube nezizumbulu ukuthi uqale ibhizinisi kodwa kufanele uqale ngalokho onakho.
“Ukube ngalinda ukuthola imali eningi ngaphambi kokusungula ibhizinisi ngabe angizange ngiqale. Ngiyacela abantu abafuna ukuqala amabhizinisi basheshe bawasungule, basebenzise lokho abanakho. Uxhaso luzokuthola ngendlela,” kusho uSithole.
Uthe olunye uxhaso lokufukula ibhizinisi uluthole ngokungenela umncintiswano wakwaSA Home Loans obizwa ngeSekela Development Programme.
“Emuva kokusayina isivumelwano sokudayisa amakhekhe ami ePick n Pay bekufanele ngithole indawo esesimeni esifanele yokusebenzela, ehambisana nezokuphepha kokudla emhlabeni jikelele. AbakwaSekela balibhekile ibhizinisi lami base bengicathulisa. Namhlanje ngikuleli zinga engikulo ngenxa yabo. Ngiyabagqugquzela abantu ukuthi bawalandele amaphupho abo,” kusho uSithole.