Isoka ebelaliwa libhokode intombi phambi komndeni
KUBATSHAZWA isihluku sesoka okuthiwa libhokode ngommese intombi phambi kwamalungu omndeni wayo ngoba lingafuni ukwamukela ukwaliwa, eMvelabusha, eManguzi.
UNksz Nomfundo Mlungwana (22) ugwazwe amanxeba amaningi emzimbeni ngoLwesibili.
Kuthiwa umsolwa ufike kubo kamufi bahilizisana wabe esemgwaza kaningi, ngisho noma amalungu omndeni esengenelela kuthiwa uqhubekile nokugwaza umufi maqede wabaleka.
Umsolwa ugcine eboshiwe izolo.
Kuthiwa umufi nomsolwa bese bethandane isikhathi eside kodwa muva nje bese behlala ngokuxabana.
Kuthiwa umufi wale isoka wacela ukuqhubeka nempilo kodwa kuthiwa alizange likwamukele lokho njengoba lifike kubo selihlome ngommese.
Umthombo weSolezwe osondelene nodaba, ocele ukungadalulwa, utshele leli phephandaba ukuthi umsolwa ubengafuni kwakuyizwa eyokuthi intombi ithi ucu kalusahlangani.
“Okwenzekile ukuthi umufi wale isoka ngoba bengazwananga, isoka lifike kubo likhala ngokuthi ngeke likwazi ukuhlukana nalo wesifazane. Ingxabano iqale lapho, wabe esemgwaza,” kuchaza umthombo.
Unina omdala kamufi, uNkk Busisiwe Ndlazi, uthe namanje kusenzima ukukhuluma ngabakubonile kubulawa indodakazi ngesihluku.
“Bengikwenye indlu, unina wentombazane esemasimini ngesikhathi sizwa ukukhala. Siphuthumile safica emgwaza, ephethe ummese ngesandla. Umgwaze inqwaba yamanxeba. Sihlukumezekile kakhulu ngesihluku esisibonile,” kusho uNkk Ndlazi.
Uthe umufi ubengasebenzi futhi engafundi ehlala ekhaya.
UNkk Ndlazi uthe yena siqu ubengalazi isoka lendodakazi kodwa akhona amanye amalungu omndeni abelazi ngoba bese kunesikhathi bethandana.
“Akukho abesekukhiphile ukuze abe ngumkhwenyane lapha ekhaya, bebethandana nje,” kusho uNkk Ndlazi.
Okhulumela amaphoyisa KwaZulu-Natal, uColonel Thembeka Mbele, uthe amaphoyisa aseManguzi aphenya icala lokubulala.
“Owesilisa oneminyaka engu36 uboshelwe icala lokubulala owesifazane oneminyaka engu22 eManguzi. Umsolwa uzovela kusasa (namhlanje) enkantolo,” kusho uCol Mbele.