Uhlelelwa impi enkulu uKomanisi
UHLELELWA indumezulu yempi obengumpetha we-Internatinal Boxing Organisation (IBO) featherweight, uLusanda “Mexican” Komanisi, osanda kusayina nesitebele iGolden Gloves Promotions kaRodney Berman.
UKomanisi wase-East London ugcine ukungena eringini ngoSepthemba nyakenye eshayiswa okwengane nguJhack Tepora wasePhilippines. UTepora uwine le mpi ngomngqimuzo womlalisa phansi ngomzuliswano wesibili bebanga ibhande le-World Boxing Organisation (WBO) Inter-Continental Featherweight phambi kwabalandeli bakhe e-East London. UKomanisi uthathe isinqumo sokunyukela esiswindweni se-Lightweight esishaya ngamabhokisa asezingeni eliphezulu eNingizimu Afrika okukhona kuwona owayengumpetha we-IBO Lightweight, uXolisani “Nomeva” Ndongeni, Simphiwe “V12” Vetyeka owayengumpetha we-World Boxing Association (WBA) Featherweight no-Azinga Fuzile obengumpetha we-SA Featherweight.
UBerman udalule ukuthi ufuna ukuqhatha uKomanisi noNdongeni empini afuna imise nse yonke into esibhakeleni saseMzansi. Indlela kaKomanisi ebheke kuNdongeni kufanele idlule kuMichael Mokoena empini ezoba ngenyanga ezayo e-Emperors Palace.
“INingizimu Afrika izobona uKomanisi omusha. Sonke siyazi ngoNomeva nobungozi bakhe. Uma uKomanisi ewina, sizobe senze impi enkulu kakhulu esezingeni likaPhillip Ndou noCassius Baloyi. Nalapho bekubhekene ibhokisa nomuntu oshaya odalimede bezibhakela,” kusho uBerman. Impi kaKomanisi noMokoena izobhulela amazolo ezoba phakathi kukaThabiso “The Rock” Mchunu noThomas “Tommy Gun” Oosthuizen owayengumpetha we-IBO light heavyweight.
UNdongeni uzovikela ibhande le-World Boxing Federation (WBF) kuSalumi Jengo waseTanzania ngoMgqibelo eDOCC Hall e-Orlando, eSoweto. Le mpi bekufanele ibe ngenyanga edlule kwazise kuhloswe ngayo ukubhiyozela iminyaka ewu100 kaNelson Mandela kodwa yahlehla ngenxa yezingqinamba.