Abahlaziyi bashayela izandla uDe Lille neDA
ABAHLAZIYI bepolitiki bathi iDA inqume ukuhoxisa amacala kaNkk Patricia de Lille ngoba ibona ukuthi ukuqhubeka nemizamo yokumqondisa ubugwegwe kuzoyilahlekisela ngokuningi.
Baveze ukuthi vele uNkk de Lille ubesenqobe amacala amabili enkantolo okusho ukuthi bekungenzeka aphinde anqobe nesigaba sokuqondiswa ubugwegwe sangaphakathi kwiDA.
Izolo umholi weDA, uMnuz Mmusi Maimane, uthe bafinyelele kwisivumelwano esivuna zonke izinhlangothi nemeya yaseCape Town.
“Kuyintokozo ukuthi ngimemezele ukuthi sivala isigaba esinzima siwubuholi beDA. Sivumelene ukuthi siyawahoxisa wonke amacala ebesiwabeke uNkk de Lille ngaphakathi eqenjini. Uphenyo olwenziwa wuMasipala waseCape Town luzoqhubeka ngoba siyiqembu eliziqhenya ngohulumeni ongenayo inkohlakalo,” kusho uMaimane.
UNkk de Lille uthe uyajabula ngokuhoxiswa kwamacala ngoba vele wayeshilo ukuthi umsulwa.
“Ngafuna ukuthi uma ngizoqondiswa ubugwegwe kube yisithangami esivuleleke kwabezindaba, nginikwe ithuba lokuziphendulela ngezinsolo engibekwa zona. Nginqume ukuthi ngisule njengeMeya yaseCape Town kusukela ngo-Okthoba 31. Kulezi zinyanga ezintathu ezizayo ngizokwenza isiqiniseko sokuthi umhlaba kamasipala awudliwa futhi abantu bathola izindlu zokuhlala,” kusho uNkk de Lille. Umhlaziyi wepolitiki ozimele wepolitiki, uMnuz Thabani Khumalo, uthe uNkk de Lille nguye onqobile kulesi sivumelwano ngoba iDA izamile ukumxosha kodwa yahluleka. Omunye umhlaziyi wepolitiki, uMnuz Ralph Mathekga, uthe uNkk de Lille neDA besebekhathele yizinkantolo yingakho bekhethe ukubuyisana.