Akaliboni iphutha ngozankosi emaqakaleni
BANINGI abazwakalise ukunengeka ngesenzo sokuboshwa emaqakaleni kwendodana yobengumengameli wezwe, uMnuz Dududane Zuma (34) obevele enkantolo ngeledlule.
Isolezwe licele u-Adv Mandla Khawula ukuthi alubheke kabanzi lolu daba njengoba abanye besigxekile isenzo sokuboshwa emaqakaleni kukaZuma evela enkantolo.
Abagxeka lesi senzo bathi besingekho isidingo njengoba uZuma ezinikele emaphoyiseni ngoba okwenzekile kumenza abukeke eyisigebengu esisatshwayo.
Indaba yokuboshwa emaqakaleni ibe undabuzekwayo ngoba ngokujwayelekile umuntu ufakwa ozankosi ezihlakeleni.
Yikona-ke lokhu kuboshwa emaqakaleni okususe inkulumompikiswano, abanye bakholwa ukuthi ngokwenze njalo amaphoyisa aphule ilungelo lakhe ngoko-Mthethosisekelo.
Abanye bakholwa wukuthi amaphoyisa abebukisa nje besingekho isidingo sokuboshwa ngale ndlela. Abanye bakholwa ukuthi wehliswa isithunzi ngenxa yezepolitiki.
Ukuboshwa izandla namaqakala kujwayeleke ukubonakala uma kuboshwa isiboshwa esiyingozi emphakathini noma kuwo amaphoyisa uqobo noma uma amaphoyisa ekholwa ukuthi singabaleka.
Konke lokhu kulala esinqumweni sephoyisa elibophayo emuva kokuhlolisisa kahle isimo salowo oboshwayo. Awukho umthetho obhalwe phansi esingacaphuna kuwo olawula indlela okumele ozankosi bafakwe ngayo.
Umuntu oboshwayo kufanele kuvikelwe isithunzi sakhe ngoba unamalungelo ngaphansi koMthethosisekelo wezwe.
Uma umuntu eboshwa amaphoyisa aphoqelekile ukufundela oboshwayo ngamalungelo akhe njengelokuthula angaphenduli lutho.
Amaphoyisa abophe uZuma akhethe ukumbopha emaqakaleni hhayi ezihlakaleni njengokujwayelekile.
Umbuzo uthi ngabe ukuboshwa afakwe ozankosi emaqakaleni esikhundleni sokubafaka ezihlakaleni kuye kwalephula yini ilungelo lakhe loMthethosisekekelo?
Ngabe ukuboshwa komuntu noma yimuphi emaqakaleni esikhundleni sokumbopha ezihlakaleni kuyindlela yokumehlisa isithunzi na?
Ngokubona kwami akuwenzi umehluko futhi akuliphuli ilungelo lalowo oboshwayo ngokoMthethosisekelo, inqobo nje uma iphoyisa linesizathu sokukhetha ukufaka ozankosi emaqakaleni hhayi ezandleni.
Asikazeke siluzwe uhlangothi lwamaphoyisa abophile. Futhi luyezwakala uhlangothi lwalaba abathi bekungafanele aboshwe emaqakaleni ngoba uziyise yena emaphoyiseni, okusho ukuthi ubengeke abaleke.