Sicela ungqongqoshe ake asiphenyele
MHLELI: Kwelakho olithuma lifike, ngithi nami ake ngisike elijikayo ngokukhathazeka enginakho ngomasipala wangakithi, uMhlabuyalingana.
Ngiyacela Mhleli ukuthi uNgqongqoshe uNomusa DubeNcube ake angenele kulo masipala wethu uMhlabuyalingana ngoba sibona ukuthi kusebenza amaqola kuwona.
Kunekampani eqashwe wumasipala eyenza ubugebengu obushaqisayo ihlangene nomqondisi wezobuchwepheshe kuwona lo masipala.
Ngenxa yokuthi amakhansela kamasipala awanalwazi ngezindaba zamathenda uyazitamuzela nje umqondisi wezobuchwepheshe ezimalini.
Kunemali efakwe wumkhandlu enguR3 million kule nkampani eyayicelwe wumqondisi wezobuchwepheshe ethi kunosonkontileka bendawo abancane abadinga ukusebenza ngaphansi kwale nkampani owakha ihholo lakwaMbila.
Leyo mali sesithole ukuthi idliwe. Ibuhlungu into eyenzeka kulo masipala ngoba kuyimanje sebesabisa osonkontileka abancane.
Babaqasha kodwa umnikazi wenkampani uselwa nabo akasayingeni eyokuthi basebenze, ugoloza nemali efakwe umasipala ukuthi ayikhokhele bona osonkontileka abancane uma sebesebenzile.
Umnikazi wale nkampani egcina ukuza kubona wabasabisa, ebachomela ngokuthi inkampani ngeyakhe ayilona ifa labazali ngakho akekho ongamtshela ukuthi akenzeni.
Siyacela kuNgqongqoshe uDube-Ncube ake ayilandele indaba yale mali athole ukuthi yasebenza kanjani.
Kumele kuphenywe nomqondisi, unjiniyela nomnikazi wenkampani. Ikhona ngisho i-email kubona labo sonkontileka ababasabisayo. Nginawo namagama alezi zikampani ezincane abazisabisayo nabaninizo. Inombolo yami ngiyishiyile ephepheni.