Sizomenyezelwa kusasa isikwati seSpringboks
SIZOMENYEZELWA kusasa isikwati sabadlali abawu-12 beSpringboks Sevens abazolibangisa kwiNdebe yoMhlaba ezoba seSan Francisco, e-United States of America (USA).
Izoqala ngoJulayi 20 isongwe ngoJulayi 22 e-AT&T Park.
UNeil Powell ocija amaBlitzbokke anqobe nawo isicoco seHSBC World Rugby Sevens kabili kulandelana, uthe awafuneki amaphutha kwiNdebe yoMhlaba njengoba befuna ukuqhubeka lapho begcine khona kwiWorld Rugby Sevens ngokuthi banqobe umqhudelwano ongowokugcina kwisizini yeRugby Sevens.
“Alifuneki nelincane iphutha leli. Indlela ehlelwe ngayo le midlalo ngokwamaqoqo isitshela ukuthi iphutha elincane ongalenza ushibilike, kungenzeka kube yiphutha elingakwenza usizwe ngendaba isicoco. Yingakho sifuna ukuzilungiselela ngendlela, siqinisekise ukuthi ngesikhathi esizohamba ngaso konke kumi ngomumo,” kusho uPowell.
AmaBlitzbokke azobhekana ne-Ireland noma iChile emdlalweni wokuqala (la mazwe azozwana amandla kowokuhlunga). Lo mdlalo uzoba ngoJulayi 21.
“Ngilindele ukuthi abadlali bethu baqhubeke nokuzinikela nokusebenza kanzima. Asifuni nakancane ukulahlekelwa yisigqi sethu seWorld Series,” kuqhuba uPowell.
NgoLwesihlanu kuzoba nomcimbi wokuvalelisa amaSpringbok Sevens ozoba seStellenbosch, kuthi ngoMgqibelo abambe indiza ebheke eSan Francisco.
Izimbangi ezinkulu zeNingizimu Afrika kumaSevens yiFiji neNew Zealand. Nakulokhu akulindelekile ukuthi kube nomehluko uma sekuqala umqhudelwano.