I-Russia ipakishise iSpain ebithwelwe ngeqoma
Spain (1) 1 Russia (1) 1 (IRussia idlule ngo 4-3 kumaphenathi) IRUSSIA idlulele kuma-quarter final eNdebe yoMhlaba kulandela ukushaya iSpain ngo 4-3 sekukhashaywa amaphenathi izolo ntambama eLuzhniki Stadium.
ISpain iphuma nje izenze yona kwazise umdlalo iwuphathe uqala kwaze kwaba uyaphela ngo 1-1. OKoke no-Iago Aspas yibona abageje amaphenathi.
Okungavamile okwenziwe ngumqeqeshi weSpain Fernando Hierro ukushiya ngaphandle u-Andreas Iniesta, indawo yakhe yathathwa uMarco Asensio. Isinqumo sikaHierro, oqashwe sekusele usuku olulodwa ukuthi uqale umqhudelwano waseRussia, sisheshe sacaca ubuhle baso ngoba u-Asensio ube nesikhulu isandla kuvela igoli lokuvula umdlalo elishaywe iSpain. Kube yi-freekick yakhe lo mdlali weReal Madrid ephoqe ukuthi umkhonto kaSergei Ignashevich (umdlali weRussia) ugwaze ekhaya ngomzuzu ka-12.
Ngemuva kwaleli goli kube sengathi zithelwe ngezibonkolo ezasekhaya kwazise yizona ebezifika zifikile emapalini kaDavid De Gea. Nakuba ibizama, iRussia ibithwele kanzima, isikhathi esiningi ibhola belikompetha bomhlaba bango-2010. Ngesikhathi kubukeka sengathi iRussia izoya ekhefini ilandela ngemuva, ithole iphenathi edaleke kuGerard Pique. Leyo phenathi ithathwe u-Artem Dzyuba ngomzuzu ka-41. Le phenathi bekuyibhola lokuqala ebelishaywe labhekiswa emapalini zinhlangothi zombili. Lokhu kusho ukuthi, yize ibiliphethe kakhulu ibhola, iSpain ibingeyona ingozi kangako kwiRussia.
Nesiwombe sesibili siqale ngomfutho ofanayo zisalokhu zithengana kodwa kubonakala ukuthi iSpain isaliphethe ibhola, yize neRussia ibinezimpawu zobungozi uma ilitholile ithuba lokuhlasela. Uze wangena u-Iniesta emdlalweni ngomzuzu ka-67 ethatha indawo kaDavid Silva.
Zibheke emzuzwini ka-70, bese kungathi iSpain isiyaziqeqesha kwazise iRussia ibisihleli yonke emuva. Kuze kwalamula ukuphela komdlalo ilokhu ingene njalo iSpain.
Ngomzuzu ka-97, esikhathini esengeziwe, u-Alexandr Yerokhin ungene emlandweni weNdebe yoMhlaba ngesikhathi eba wumdlali wokuqala ukungena abe owesine weqembu elilodwa esuka ebhentshini. Umthetho omusha weFifa usuyakuvumela ukuthi kufakwe umdlali wesine emiqhudelwaneni yayo uma sekusesikhathini esengeziwe.
Akukho okutheni okwenzekile kuzona zombili iziwombe ngaphandle kokuthi iSpain ibiphaselana ngendlela ebithanda ngayo kodwa lutho ukuba yingozi.