UMthembu useqashe imenenja ngolwenkontileka
USEYIQASHELE imenenja indaba yenkontileka yakhe kwiFree State Stars umgadli uSiphelele Mthembu okungacaci ngekusasa lakhe eqenjini.
Inkontileka kaMthembu neStars iphele ngoMgqibelo. Nokho kuvalelwe ukuphela kwesizini izingxoxo zokuyivuselela zingaqediwe. Ngokomthetho kumanje uMthembu akanalo iqembu. Uthe usaziqeqesha neStars ngoba izingxoxo zenkontileka entsha zisaqhubeka. Useqoke ukuthi kube nguMicky Paive omkhulumela indaba yenkontileka kwi-Ea Lla Koto. UMthembu ungomunye wabadlali abaziwayo ukuthi abayingeni indaba yokuba nezimenenja ebholeni laseNingizimu Afrika. Ubehlala etshela abezindaba ukuthi imenenja yakhe uMoya oyiNgcwele.
“Ngilinde ukuzwa ukuthi iStars sithini ngekusasa lami. Ikhuluma nemenenja yami, ngizozwa ngayo ukuthi kugcina kanjani. Uyazi ukuthi indaba yezimenenja bengingayingeni kodwa kulokhu ngiqoke ukuyithola. IStars ixoxa nayo. Bengifuna ukwenza ukwethembeka ngoba ngisebenze kahle nayo. Akhona amaqembu angifunayo kodwa bengifuna ukunikeza ithuba iStars kuqala. Sekusezandleni zayo manje,” kusho uMthembu.
“Ngisaziqeqesha neqembu. Ukuba bengifuna ukuhamba ngabe kade ngakwenza lokho ngokusayina inkontileka yesibambiso ngoJanuwari. Ngiqoke ukulinda kuze kufike ekugcineni. Umqeqeshi (Luc Eymael) sivale eshilo ukuthi uyangidinga. Sengijahe ukushaya amagoli ngesizini ezayo. Ukuzethemba kusephezulu.”
Ngesonto eledlule u-Eymael uveze ukuthi usethungatha omunye umgadli ngoba ayicaci indaba kaMthembu nenkontileka entsha. I-Ea Lla Koto kuvele ukuthi isisayinise u-Eleazar Rodgers obelizwa ngendaba ijezi kwiBidvest Wits noLinda Bhengu AmaZulu abemboleke uMthatha Bucks kwiNational First Division (NFD). IStars ihlukane noMohammed Anas waseGhana omenyezelwe njengomdlali omusha wePolokwane City ngesonto eledlule. U-Anas ubevele eshilo ukuthi akasazimisele ukudlala eBethlehem ngoba akezwani no-Eymael.