Amakhulu amise konke emasha
KUME yonke into emgwaqweni uDkt Pixley kaSeme, eThekwini, ngoMgqibelo ngesikhathi amakhulu amalungu omphakathi eholwa ngamabandla ehlukene ebhikishela ukuhlukunyezwa kwezingane nabesifazane.
Imashi isuke kuBotha yayophela eCity Hall.
Ababhikishi abebeholwa nguMbhishobhi Vusi Dube bebebuye bame phakathi nomgwaqo bakhuleke okwenze ukuthi kuphazamiseke ukuhamba kwezimoto.
Ngaphandle kwabefundisi bekukhona nomculi wowokholo, uThobekile, obengomunye wabantu abebehamba phambili.
ECity Hall kuvele kwavulwa inkonzo kwahlatshelelwa kwaphinde kwakhulekwa.
“Sihlangene lapha ngenhloso yokuzokhuza isihlava sokuhlukunyezwa kwezingane nabantu besifazane emiphakathini yethu,” kusho uDube.
Uthe sebephelile abantu besifazane bebulawa ngabantu abasondelene nabo.
“Size lapha ukuzoshumayela indaba yobumbano nokuthandana emindenini ngoba siyabona ukuthi kukhona okungahambi kahle. Uma imindeni ingakheleka phezu kwesisekelo sothando ingaphela le nto esiyibona yenzeka emiphakathini yethu,” kusho uDube.
UNksz Smangele Mthiyane waseLamontville obesemashini uthe sebeyasaba manje ukuqoma ngenxa yokwenyuka kwesibalo sabesifazane ababulawa ngamadoda abo.
“Uqoma umuntu ube unokusaba ngenxa yezinto ezenzekayo. Siyabanxusa abantu besilisa abahlukumeza abantu besifazane ukuthi bawuyeke lo mkhuba,” kusho uNksz Mthiyane.
Ababhikishi bebephethe izingqwembe ezibhalwe imibhalo eyahlukene kukhona nabaphethe ama-poster eSolezwe abhalwe ukuthi #Sekwanele.
Isolezwe liqale umkhankaso othi #Sekwanele ngenxa yokukhathazeka ngokudlanga kokubulawa kwabesifazane emphakathini.
Cishe alipheli isonto kungabikwanga kwabezindaba ngokubulwa ngesihluku kwabesifazne ezindaweni ezehlukene ezweni lonke.