Usola ububha ngezenzo zentsha
UMHOLI weDA kuzwelonke, uMnuz Mmusi Maimane uthi ukungabi bikho kwamathuba omsebenzi kufaka intsha ezidakamizweni nasebugebengwini.
UMaimane usho lokhu eChristian Revival Centre, eChatsworth izolo.
“Umphakathi waseChatsworth unenkinga yobugebengu obuthinta abantu abasha, abagxile ezidakamizweni ngenxa yokungasebenzi. Sizoqhubeka nokusebenzisana nabo bonke abaholi bezenkolo ukulungisa lesi simo,” kusho uMaimane.
Uphinde wagqugquzela abantu baseNingizimu Afrika ukuthi bayeke ukucwasana kwalo lonke uhlobo.
“Akukho okuzosilungela uma sicwasana. Ngikhumbula ngibuka ithelevishini emuva kokufa kukaChris Hani, ngangiphatheke kabi futhi uNkulunkulu wangibiza ukuthi ngishumayele ivangeli lokuthi masithandane siyeke ukucwasana. Ngizoqhubeka nokulishumayela ngoba kufanele sibambane, sithandane singabantu ukuze sizophumelela,” kusho uMaimane.
Umholi wentsha yeDA, uMnuz Luyolo Mphithi naye uhambe emazwini kaMaimane wathi uzoza nezisombululo ezizosiza intsha engasebenzi.
Esitatimendeni sokusongwa kwenyanga yabantu abasha, uMphithi uthe njengoba u-50% wentsha ungasebenzi kusho ukuthi iningi layo ligcina selingene ebugebengwini.
“Intsha ayisebenzi yingakho igcina ingena ebugebengwini. Okubuhlungu wukuthi nohulumeni we-ANC unenkohlakalo bese umnotho uhluleka wukudala amathuba omsebenzi. Abantu abakhohlakele bayavikelwa yi-ANC kungabikhona ojezayo ngokuchitha imali,” kusho uMphithi.
Uthe bengabantu abasha kwiDA banohlelo lokusiza abantu abasha futhi bazokuya zonke izindawo ukubasiza ngamasu abanawo.
“Lapho kuphethe khona iDA izinga lokungasebenzi lehlile njengoba eWestern Cape sidale amathuba omsebenzi angu-75%. Izinga lokungasebenzi lehlile eTshwane, eGoli naseNelson Mandela Bay. Lokhu kwenziwa wukuthi lapho siphethe khona silwa nenkohlakalo futhi abantu bathola umsebenzi ngoba beneziqu zemfundo namakhono adingekayo hhayi ngobubhululu,” kusho uMphithi.
Ugqugquzele abantu abasha ukuthi babhalisele ukuvota bese bevotela inhlangano abayithembayo ukuthi izobalethela ikusasa eliqhakazile elinamathuba omsebenzi.