UGabuza uhlelelwa eyokudlala emuva
UMQEQESHI we-Orlando Pirates, uMilutin “Micho” Sredojevic, uyidlela amathambo engqondo eyokudlalisa emuva ngokuphelele umgadli waleli qembu uThamsanqa Gabuza othwale kanzima ukuthola ijezi kule sizini.
UMicho ufike kwiPirates ekuqaleni kwesizini ka-2017/2018 enengcindezi yokubuyisa izinsuku zenjabulo. Izinguquko azenzile ziholele ekutheni kuhambe abanye abadlali, nokugudluka kwabanye abebethola ijezi ngesizini edlule lapho eZimnyama ziwine khona imidlalo eyisithupha kuphela kwi-Absa Premiership. UGabuza, obehola abagadli ngesizini edlule, ubhekene nobunzima bokuthola ijezi. Ubanga indawo nabagadli uJustin Shonga no-Augustine Mulenga baseZambia. Ngesikhathi iPirates ibhekene neBloemfontein Celtic kowePremiership, uGabuza uwuqede umdlalo eseyibambe emuva. Emidlalweni eyandulela lona, uMicho ugxeke uGabuza ngokungafuni ukuhlala ebhokisini alinde amabhola, wathi ugcogcoma ezinhlangothini aphazamise abadlali abadlala lezi zindawo.
“UGabuza wayedlala ngaphansi kukaManqoba Mngqithi kwiLamontville Golden Arrows njengomdlali wamaphakathi emuva. Ezikhathini lapho nathi besimdinga, simfake khona ngoba sidinga omunye umdlali wasemuva ozovala siwine umdlalo. Kusisebenzele. Lena yinto okufanele siyibhekisise ngoba siyakholelwa emandleni okuqeqesha nokucija. Umsebenzi wakhe wokuqala wukuba ngumgadli kodwa sinabadlali abadlala izindawo eziningi,” kusho uSredojevic.
Nakuba uMicho ekusho kaningi kule sizini ukuthi akabhekile ukuwina isicoco seligi kodwa iqembu lakhe lizithole lifaka ingcindezi kwiMamelodi Sundowns. Abekade ephumela obala ngakho lo mqeqeshi wukuthi eZimnyama ufuna zidlale kwiCAF Champions League ngesizini ezayo nokuyiphupho elibukeka lizofezeka.
UMicho uveze ukuthi nakuba belandela indlela abadlali ababolekisiwe abadlala ngayo kodwa bakhona abamannye amaqembu ababheke ukubaletha kweZimnyama ngaphambi kokuqala kwesizini ezayo. Kubadlali ababolekiswe eZimnyama kwamanye amaqembu kukhona uNkosinathi Mthiyane okwiChippa United, Tercios Malepe okwi-Ajax Cape Town, Riyaad Norodien no-Ayanda Gcaba abakwiPlatinum Stars, Gift Mothupa oyibamba kwiBaroka nabanye. I-Pirates ingelinye lamaqembu okuvela ukuthi lifuna unozinti weKaizer Chiefs, uBrilliant Khuzwayo, oseqedela isizini eNaturena emuva kokwinqaba ukusayina inkontileka entsha.
“Sibabheka bonke abadlali bethu ababolekisiwe. Sibabheke ngeso elilodwa. Sibheke kakhulu laba esisebenza nabo njengamanje. Kodwa futhi sibheka nabanye abadlala kwamanye amaqembu esibona ukuthi bangangena khaxa kuleli qembu esifuna ukulibumba,” kusho uSredojevic. Imidlalo ye-Absa Premiership:
NgoMgqibelo ngo-3 ntambama: Golden Arrows v Platinum Stars (Princess Magogo Stadium); Baroka FC (FNB Stadium); Cape Town City FC v Orlando Pirates (Cape Town Stadium); Mamelodi Sundowns v Ajax Cape Town (Lucas Moripe Stadium); Bidvest Wits v AmaZulu FC Bidvest Stadium).