OweChiefs ubona umhlola ekhaya
KUZOBA olukhulu usizo ukuthi abadlali bazinuke amakhwapha babhekisise isandla sabo kukhona konke okwenzekile eqenjini njengoba isimo sinje.
Lokhu kushiwo yibamba lomqeqeshi weKaizer Chiefs, uPatrick Mabedi, obingelelwe ngesibhaxu sika 3-1 uvela kwiLamontville Golden Arrows koweligi ngoLwesibili.
Lona bekungumdlalo wokuqala kaMabedi kusukela ebanjiswe umsebenzi olaxazwe uSteve Komphela ngemuva kokukhishwa yiFree State Stars kwiNedabank Cup, okulandelwe yizibhelu ezishiye ibhola laseNingizimu Afrika liyinhlekisa emhlabeni. Nakuba kubaphazamisile lokhu okwenzekile yena nabadlali, uMabedi uhlabe ikhwelo alibhekise kubadlali ukuthi babhukule bazikhombise ukuthi bangabadlali bebhola elikhokhelayo. “Ngeke ngiphike ukuthi izigemegeme zaseMabhida zisiphazamisile ngezindlela eziningi. Akumele kodwa sisebenzise lokho njengehawu lokuthi sithole imiphumela efana nale. Kuningi esisazokudlalela kwazise namaphuzu ebesizibekele ukuqeda sikuwona sisengafika kuwona. Konke okwenzekile kusishiye sishaqekile. Akekho obekulindele okwenzekile futhi kuzosisiza ukuthi sisheshe sikukhohlwe ngoba akukho esisengakwenza ukukuguqula,” kusho uMabedi.
Ebuzwa ngokuthi uwubhekile yini lo msebenzi ngokugcwele noma unovalo lokuthi uma kuqashwa umqeqeshi omusha kungenzeka afike nethimba lakhe, uMabedi uthe akazikhathazi ngokuzokwenzeka kusasa ngoba uMdali kuphela owaziyo.
“Angazi ngekusasa lami kepha le midlalo esele yiyona eduma ekhanda lami. Sinomsebenzi osihlalele kepha ngizodinga abadlali ukuthi bazikhumbule ukuthi bangobani. Ngeke siphenduke iqembu elibhedayo ngenxa yemiphumela emibili. Isizini yonke sidlale kahle kodwa inkinga yokufaka ibhola enethini yiyona esibulele. Nakowanamuhla nizibonele ukuthi siwakhile amathuba anele kodwa angasebenza. Ngibona kuzosisiza ukuthi nabo abadlali bazibheke ukuthi banaso yini isandla ekutheni izinto zenzeke ngale ndlela ezenzeke ngayo,” kuqhuba uMabedi okhale kakhulu ngekhadi elibomvu elinikwe uLeonardo Castro ngomzuzu ka-18.
NgoMgqibelo iChiefs izovakashelwa yiMaritzburg United evutha ingabaselwe kulezi zinsuku. Umdlalo useFNB Stadium, eGoli, okuzoba owokuqala ekhaya kusukela uKomphela eshiye phansi. Ngemuva komdlalo weMaritzburg, uMabedi uzovala isizini ngokuvakashela i-Ajax Cape Town nayo ekhombisa izimpawu zokuvuka emaqandeni.