Idinga ukusukunyelwa le nto yethu yodlame uma sidiniwe
NGOLWESIBILI kuvele ukuthi kunomfana ona-16 oshonile kade amaphoyisa ehlakaza isixuku ebesibhikisha eNorth-West sifuna uNdunankulu uSupra Mahumapelo adede esikhundleni.
UKitlano Leeuw kuthiwa ubengesiyo ingxenye yemibhikisho, ubemi nabebebukela kodwa ugcine etholwe amachaphazelo. Kusaphenywa ukuthi kwenzeke kanjani ukuthi uKitlano ashone ngoba kufanele ngabe amaphoyisa abesebenzisa izinhlamvu zenjoloba hhayi ezangempela.
Umbango waseNorth-West owepolitiki kodwa abantu bakhetha ukusebenzisa udlame ukuveza ilaka labo, bavimba iziguli ukuthi zingene ezibhedlela, bavale imigwaqo, bashisa namathayi. Kunalesi siphithiphithi nje eNorth-West, namanje kusabongwa umusa ukuthi akuphumanga sidumbu eMoses Mabhida Stadium ngoMgqibelo ngesikhathi abalandeli bevuka umbhejazana behlasela onogada, abadlali, becekela phansi impahla ngoba bedinwe umphumela womdlalo weKaizer Chiefs neFree State Stars.
Akuqondakali ukuthi uma abantu becasulwe umphumela futhi bengasamfuni umqeqeshi, yini kufanele bakuveze lokho ngokuhlasela abanye futhi bacekele phansi impahla? Ematekisini sekwaba yisinkwa semihla ngemihla ukuthi abangazwani bazohubhana ngezinkabi njengoba sibonile nakuleli sonto KwaNdengezi nokuholele ekufeni komgibeli. Isikapakele ngisho ezinganeni le nto yodlame njengoba nasezikoleni izingane sezithi uma zixabene kugcine sekuphuma isidumbu.
Idinga ukusukunyelwa le nto yethu yokuba nodlame. Siyisizwe esinjani esithanda udlame? Yini lena esidine kangaka? Sizogcina sishabalele isizwe uma siqhubeka kanjena. IsiZulu sithi izinto zoniwa ngomlomo futhi zilungiswe ngomlomo. Kodwa thina bantu abamnyama sesikushintshile lokho, sixazulula izinto ngodlame nangesibhamu.
Yebo imibhikisho enodlame yalekelela ngesikhathi kuliwa nohulumeni wobandlululo futhi impi yayiqalwe nguye uhulumeni. Kodwa sesidlulile isikhathi sokuthi izinto zilungiswe ngodlame. Uhulumeni kumele asebenzisane nezinhlaka zezenkolo nezinye izinhlangano ezigqugquzela ukuziphatha kahle ukuthola umnyombo wale ntukuthelo ukuze kuzoqhanyukwa nezisombululo. Alikwazi izwe ukuthi lingaqhubeka libuswe ubulwane.