Babe yisibonelo bethweswa iziqu
BAFUNA ukuba yisibonelo nangemfundo abaholi bezitshudeni ezikhungweni zemfundo ephakeme, abathweswe iziqu kuleli sonto.
Kuqophekele umlando kuleli sonto e-University of KwaZuluNatal kuthweswa iziqu abaholi be-Student Representative Council (SRC) abayisithupha. Kube esifanayo eDurban University of Technology (DUT) lapho beyisishiyagalombili abazothweswa iziqu kule sizini ezophothulwa ngoMeyi 14.
USiphiwe “Wele” Vilakazi oyiphini likamengameli weSRC eDUT eMgungundlovu, izolo uthweswe iziqu zeB-Tech kwiPublic Management. USiphiwe waziwa nangokuba ngusomahlaya newele lakhe abaziwa ngamaWele aseChesterville. Uthe kumanje wenza iMasters Degree.
“Ngifuna ukuba yisibonelo kwabanye abafundi ngoba nabo siyabaphusha ukuthi bafunde. Sesadlula isikhathi lapho kwaziwa ukuthi abaholi beSRC bazi ipolitiki kuphela,” echaza.
Uthe okunye okumenza athande ukufunda ukuthi umkhakha wezokungcebeleka awunalo ikusasa eliqhakazile.
URobert Thema oyi-Education and Transformation Officer kwiSRC yaseDUT eMgungundlovu, uthole iziqu zeNational Diploma in Ecotourism. Uthole o-A abangu-17 ezifundweni ezingu-20 abezenza. Kumanje wenza iB-Tech in Tourism Management.
Uthe wacishe walahla ithemba emfundweni emuva kokuhluleka ukubhala umatric ngo-2013, kwadingeka awuqale phansi ngo-2014. Wayehlala nomdeni wakhe eGoli ngo-2012 kwadingeka babuyele eThekwini.
“Ngabhalisa e-Africa Vision College ukwenza umatric ngo-2013 kudingeka abafundi abangu-500 esikoleni. Isikole seqisa kulesi sibalo, ngebhadi ekugcineni abanye abafundi bangakwazi ukubhala. Ngaba ngomunye walabo bafundi ababengeke bakwazi ukubhala ngoba beqise isibalo. Kwaba nzima ngoba ngathola ngoOkthoba sengibhala iphepha lesithathu ukuthi ngeke ngikwazi ukuqhubeka nokubhala,” echaza.
Amanye amalungu eSRC athweswe iziqu nasazothweswa eDUT kubalwa u-Ozayo Ntshulana oyiSport and Recreation Officer othole iziqu zeB-Tech in Public Management, uHlanganani Shange oyi-Organisation and Accommodation Officer (PMB) obenza iNational Diploma in Ecotourism. Kukhona noNtethelelo Ngema ongunobhala eMgungundlovu othole iziqu zeB-Tech in Public Management, uNduduzo Miya oyi-Organisation and Accommodation Officer eThekwini othole iB-Tech in Tourism.
Abanye ngoNocawe Mthembu obenza iNational Diploma in Photography, uSibonelo Zwane obenza iNational Diploma in Jewellery Design.
UPhiwayinkosi Mungwe ongunobhala weSRC noSamkelo Gudazi oyiStudent Services Officer bangabanye babathweswe iziqu e-UKZN eMgungundlovu ngoLwesibili. Bathole ezeBachelor of Social Science. Bathe bafuna ukukhombisa abanye abafundi ukuthi kuyisitayela ukufunda.