Ubalelwa ezigidini umonakalo wabeChiefs
ULINGANISELWA kuR2.6 million umonakalo odaleke eMoses Mabhida abalandeli bevuka umbhejazane ngemuva komdlalo weNedbank Cup lapho iKaizer Chiefs ihlulwe iFree Stars ngo 2-0 ngempelasonto.
Lesi samba sivezwe iMeya yaseThekwini, uNkk Zandile Gumede, esithangamini sabezindaba ebesikuyona le nkundla izolo ekuseni.
“Sinohla lwempahla elimele okuhlanganisa, inkundla, amapali, uthango, nezivimbo zokulawula abantu, imigqomo, izindawo ezidedela amanzi, amapuleti, amagilasi, izihlalo namatafula. Konke lokhu kulinganiselwa kuR2.6 million,” kusho uNkk uGumede osihlabe wasihlikiza isenzo sobudlova nodlame.
Uthe bengumasipala bazoqhamuka nohlelo lokuhambela imiphakathi kufundiswe abantu ngokuziphatha ezinkundleni.
Imeya ithe kuzomele ifakelwe izibuko indaba yamambawu ezinkundleni.
“Ngeke sikubalekele lokho, yize singafuni ukucindezela ilungelo labantu lokuzijabulisa,” kusho imeya.
Ngesikhathi uNkk Gumede nabezindaba nethimba labaphathi laseMabhida bekhonjiswa umonakalo izolo, bekusabonakala lapho iqeqebana labalandeli lokhela khona ngomlilo. Zilinganiselwa kwezingu-10 izihlalo ezasha nenethi enombala osawolintshi esetshenziswa ngonogaba ukuvimba abalandeli. Sezizonke izihlalo ezalimala zixetshulwa zingu500.
Kwezinye izindawo bekukhona namabhodlela otshwala afile, kusolisa ukuthi bebezicima ngophuzo.
UMnuz Vusi Mazibuko oyimenenja yaseMabhida, uthe umbiko uzodluliselwa nakwabanye abathintekayo. Uthe abaphathi benkundla sebefake amaphepha omonokalo enkampanini yabo yomshwalense. “Bonke abantu abathintekayo banayo imishwalense evikela impahla yabo. Umbiko sizowudlulisela nakubona ngesikhathi nathi sisafake awethu amaphepha,” kusho uMazibuko.
Yena noNkk Gumede bavumelene ngokuthi asikho isidingo sokuthi iChiefs ingabe iseza eMabhida.
Kule sizini, Amakhosi alethe imidlalo yawo yasekhaya eyisithupha eMabhida. Bekungaqali ukusuka uthuthuva njengoba kwenzeka eshaywe iBaroka kowe-Absa Premiership.
“Izolo (ngoLwesibili), iChiefs idlalile e(Princess) Magogo akukho okwenzakalile. Awukho umbiko othi umdlali weChiefs owenze umonakalo kodwa umphakathi wethu owenze okubi,” kusho uNkk Gumede.
UMazibuko uthe banenkontileka yeminyaka emithathu neChiefs, eqale kule sizini futhi basazoqhubeka nayo.
Uveze ukuthi amaphoyisa enza olwawo uphenyo mayelana nezinga lezokuphepha emdlalweni. Uthe lokhu kuvele ngemuva kokuthi uSihlalo wePremier Soccer League, u-Irvin Khoza esole amaphoyisa ngokungasukumeli phezulu ingozi yodlame eyayingase ivele eMabhida.