Ngeke zisaba nezimbobo iziguli - Dhlomo
LIQOPHE umlando ithimba lodokotela abayisipesheli abelapha izifo ezithikameza ukusebenza kwezinso basesibhedlela saseThekwini, Inkosi Albert Luthuli Central, abakhiphe amatshe akheka emapayipini asezinsweni (kidney stones) ezigulini besebenzisa inaliti.
UDkt Ehab Goad nethimba lakhe obekukhona kulo nodokotela osewungoti kulo mkhakha, uDkt Hooran Patel bakwazile ukukhipha amatshe ezigulini ezintathu ezineminyaka ephakathi kuka-58 no-66 esibhedlela Inkosi Albert Luthuli Central emasontweni amabili edlule.
UDkt Goad uveze ukuthi ngenxa yokuthi iziguli azibi nomthungo omkhulu nosuke kufanele ulindwe uphole, zidedeliwe ukuthi zigoduke emuva kwezinsuku ezimbili zikhishiwe amatshe. “Uma sizama ukufinyelela ensweni sizama ukubulala amatshe ngokujwayelekile siye sivule imbobo enkulu esuke ingadala umonakalo esikhumbeni noma idale umonakalo ensweni uqobo kodwa sisebenzisa le ndlela esenze ngayo sikwazile ukuvula imbobo encane ongeke uyibone uma sekuqediwe. Le ndlela isiza ngokuthi usheshe ufike etsheni kalula futhi isiguli sikwazi ukuthi sisheshe sigoduke mhlawumbe emuva kosuku noma izinsuku ezimbili sikhishwe amatshe ezinsweni.”
Uthe bekuqala ukuthi kwenziwe lolu hlelo esibhedlela sikahulumeni njengoba lusanda kwenziwa nasezibhedlela ezizimele. Kuqala bekuvame ukuthi isiguli sihlinzwe sivulwe imbobo enkulu. UDkt Goad uthe baze baluyeka lolu hlelo ngoba lwalulimaza izinso. Uthe ukuvula imbobo ensweni kwakufana nokuyigwaza ngento ecijile futhi kwakuhlukumeza. Unxuse abantu ukuthi bazinakekele njengoba ethe sekuvamile manje ukuthi bathole amatshe kubantu. Uthe bekungavamile ukuthi bathole iziguli ezinawo kodwa manje sebezibona njalo.
Usole indlela abantu abadla ngayo wathi nayo ineqhaza ekutheni babe nawo. Uthe kufanele kungalindwa ukuthi kuze kube nezifo kodwa kufanele zivikelwe zingakaqali
Unxuse abantu ukuthi bavikele izifo ezifana nalesi ngokuthi baphuze amanzi kakhulu, badle ukudla okunempilo, bagweme ukufaka usawoti omningi ekudleni nokudla kakhulu inyama nokunye.
Ubonge ithimba abesebenzisana nalo ngesikhathi benza lo msebenzi nabaphathi besibhedlela ngokubeseka ngesikhathi belungiselela ukuwenza kwaze kwafinyelela ekugcineni.
UNgqongqoshe wezeMpilo KwaZulu-Natal, uDkt Sibongiseni Dhlomo ulincomile leli thimba ngempumelelo yalo. “Kuhle ngoba ngeke zisaba nezimbobo iziguli.”
Uthe njengomnyango bagxile ekutheni bavikele izifo ngokuthi zilashwe zisaqala kodwa bayakujabulela ukubona izinhlelo ezifana nalolu lokukhishwa kwamatshe ngendlela okwenze ngayo leli