Ufisa ukuthola umgadli owoThongathi
UHALELA ukuthola umgadli ngaphambi kokuthi kuvalwe iwindi lokuhwebelana ngabadlali ngoLwesithathu umqeqeshi woThongathi uSammy Throughton ofuna iqembu lakhe liziqhelise namaqembu asengozini yokugawulwa yizembe kwiNational First Division (NFD).
Uthongathi lwenza kahle kusukela uThroughton ethathe izintambo. Emidlalweni emibili seluqoqe amaphuzu amane. Lushaye iJomo Cosmos ebalwa namaqembu amathathu aphezulu kwi-log lwase ludlala ngokulingana ngo 1-1 neReal Kings nayo ebalwa namaqembu aphezulu.
Njengamanje seluqoqe amaphuzu angu-21 emidlalweni engu-19. Luhlukaniswe amaphuzu amane noBuntu Cape Town obuhlezi ekugcineni kwi-log. UThroughton uphumele obala ngesifiso sakhe sokuthola umgadli ngemuva komdlalo wezakhe neKings ngempelasonto ePrincess Magogo Stadium, KwaMashu ngempelasonto.
“Bengifuna amaphuzu ayisithupha kule midlalo emibili. Nokho besibhekene nemidlalo enzima njengoba besidlala namaqembu amabili aphezulu esicongweni. Amaphuzu amane ekhaya akakhalisi yize ayisithupha abezokwenza siqhele okwangempela emaqenjini asengozini yezembe. Kunezinto esisadinga ukuqinisa kuzona. Sineqembu eliqinile kodwa ngingathanda ukuthola umgadli ohlukile kunalaba esinabo. Akulula ukumthola futhi nesimo sezimali esisivumeli ukuthi singene sijule emakethe,” kusho uThroughton.
Njengamanje Uthongathi lugadla ngoDiyo Sibisi noSiyabonga Vilane.
“Kunzima ngoba kuminyene utshumo ezansi kwi-log. Amaqembu asengozini yezembe ayisithupha kuya kwayisikhombisa. Ngakho kumqoka ukuthi sisheshe siziqhelise nala maqembu ukuze sizibeke esimeni esingcono uma sekuza imidlalo yokugcina ekupheleni kwesizini,” kusho uThroughton.
Uthongathi luzokwamukela iStellenbosch koweligi ngeSonto ngo-3.30 ntambama ePrincess Magogo Stadium.
“Ngiyazi ukuthi wumdlalo wasekhaya kodwa ngeke ube lula. Nokho kumele sigxile ekuqoqeni amaphuzu amathathu,” kusho uThroughton.
Imiphumela yemidlalo yeNFD:
Uthongathi 1-1 Real Kings; TTM 2-1 AmaTuks; Cape Town All Stars 0-0 Ubuntu Cape Town; UMthatha Bucks 2-0 Mbombela United; Super Eagles 0-0 Stellenboch; Highlands Park 0-0 Richards Bay FC; Black Leopards 1-0 Royal Eagles; Cosmos 1-1 Witbank Spurs.