Icala ‘kobekhwabanisa’ ngomazisi kanjiniyela
USINDE kobezama ukusebenzisa umazisi wakhe ukudala isikweletu esitolo sezingubo unjiniyela waseMahlabathini osezinze ePitoli.
UMnuz Mandla Shandu (39), ongunjiniyela wasemayini iLonmin eNorth West, ufuna ajeze aphinde akhiphe asebenzisana nabo umlisa oboshwe kwa-Edgars enxanxatheleni yezitolo eShelly Beach, ePort Shepstone ngempelasonto edlule.
Uthe lo mlisa ubanjwe ezama ukukhwabanisa ngegama lakhe esitolo.
“Ngithuke ngoma ngithintwa abasehhovisi elikhulu lakwa- Edgars bengitshela ukuthi kunomlisa ofike wazenza mina. Bathi le ndoda ifike yathi icela ukwenzelwa elinye ikhadi lesikweletu ngoba elayo lilahlekile. Imenenja yesitolo kuthiwa isolile ukuthi kukhona okushaya amanzi uma isibheka imininingwane yami ithola ukuthi ngihlala ePitoli kodwa lo muntu uthi uzokwenza ikhadi esitolo sabo,” kusho uShandu.
Uthe imenenja ibe isicela uphiko lwasesitolo olubhekele ukukhwabanisa ukuthi lumcubungulisise lo mlisa.
“Ithe imenenja baqinisekise izinsolo zabo ngesikhathi beshayela inombolo yocingo ebhaliwe kodwa lungakhali kuyena. Bangithintile bebuza ukuthi ikhadi lami likuphi ngasho ukuthi likumina futhi ngisemzini wami ePitoli. Babize amaphoyisa waboshelwa khona lapho. Angazi ukuthi imininingwane yami uyithathephi. Kuthiwa imibuzo ngami uyiphendule kahle wahluleka esebuzwa ukuthi imali yendlu yami ngayibolekwa yiliphi ibhange,” kusho uShandu.
Okumxakayo wukuthi akakaze alahlekelwe umazisi wakhe okumenza adideke ukuthi bawuthathephi.
Imenenja yakwa-Edgars eShelly Beach, uNksz Lisa Nyuswa, inqabile ukuphawula yathi ayivumelekile ukukhuluma nezintatheli.
Okhulumela amaphoyisa KwaZulu-Natal uCaptain Nqobile Gwala uthe amaphoyisa asePort Shepstone abophe owesilisa oneminyaka engu-46 ngecala lokukhwabanisa.
“Uvele enkantolo yeMantshi ePort Shepstone ngoLwesibili icala lahlehliselwa uLwesithathu uJanuwari 31,” kusho uCaptain Gwala.