Kufanele kwenzeke okwethulwe wuRamaphosa
UFANELWE wukuthi ugculisekile uMnuz Cyril Ramaphosa ngokuphumelela kwemigubho yeminyaka engu106 kwasungulwa i-ANC njengoba bekunochungechunge lwemicimbi e-East London, e-Eastern Cape, ngempelasonto.
Zonke izinhlaka zomfelandawonye olubambisene ne-ANC zifikile, azigcinanga nje ngokubingelela esiteji njengokujwayelekile emicimbini kaKhongolose kepha zizibophezele ukubambisana nayo njengoba sekunguye umengameli.
Izinkumbi zabantu ezigcwalise phama inkundla iBuffalo City zizwakalise ukujabula nethemba abanalo.
Yilona lelo themba naye uRamaphosa abelokhu ekhuluma ngalo enkulumeni yakhe yokuqala eyenziwa ngumengameli we-ANC, iJanuary 8 Statement.
Yilo futhi lelo themba amalungu okuqina eqembu analo lokuthi kube khona ubumbano kwi-ANC, hhayi ukunqoba kohlangothi oluthize nobesekuyithumba elibuhlungu elimila i-ANC uma sekuyisikhathi sokukhetha ubuholi.
Yithemba lempilo engcono, yona le mpilo i-ANC eyayihlaba ikhwelo layo ngenkathi isaholwa yingqalabutho uNelson Mandela eminyakeni engu-25 eyedlule.
URamaphosa ubeke esinye isithombe e-East London, okungese-ANC ezoqinisa ekuphuculeni impilo yabantu ngokubanika imfundo yamahhala emanyuvesi, ukwabiwa kabusha komhlaba, ukuguqulwa ngokushesha komnotho, ukukhucululwa kwenkohlakalo nokuqinisa izinsika zombuso ukuqinisekisa ukuthi labo abanamacala bayashushiswa bajeze ngaphandle kokusaba nokwenzelela.
Wexwayisile nangokuthi i-ANC isizokhuluma ngazwi linye, ukungaboni ngaso linye kuzoba yinto ebhungwa iphelele ngaphakathi eqenjini kanti uma amalungu - naphezulu kangakanani ekhuluma noma edala uqhekeko, azojeziswa.
Sengathi inkulumo kaRamaphosa ingangagcina nje ngokunika abantu ithemba kepha kwenzeke lokhu abekhuluma ngakho.
Uma yena nesigungu esiphezulu bezimisele ngokubuyisa isithunzi seqembu ngo-2019, kumele kuye ngamagama enkehli.