‘Ngeke siwakhokhe amademeshe’
UMENGAMELI we-Economic Freedom Fighters (EFF), uMnuz Julius Malema, uthi ngeke baxolise noma bakhokhele amademeshe enzeke ezitolo zakwaH&M ngesikhathi amalungu abo ecekela phansi impahla.
Amalungu e-EFF amashele ezitolo zakwaH&M adudulela phansi izinto ezibeka impahla ekhangisiwe ngoba ecikwa yisikhangiso somfana obegqoke ijakhethii elinombhalo othi “The coolest monkey in the jungle”.
“Ngeke sixolise noma silungise amademeshe enzeke ezitolo zakwaH&M ngoba abanikazi bazo bahlambalaza abantu abamnyama. Babize izingane zethu ngezimfene. Emuva kwemashi yamalungu e-EFF sebeyayazi imfene ukuthi yinto enjani,” kusho uMalema.
UMalema usho lokhu emuva kokuthi uNksz Refiloe Nt’sekhe, okhulumela iDA kuzwelonke, ethe i-EFF kufanele ikhokhe izindleko zokucekela phansi impahla ezitolo zakwaH&M.
“Kasihambisani nezikhangiso ezicwasa ngokwebala, ubuhlanga, ubulili nangayo yonke indlela kodwa ukucekela phansi impahla ngeke kulungise lutho. Kuzoholela ekutheni abantu baphelelwe wumsebenzi kuvimbe nabatshalizimali ukuthi beze eNingizimu Afrika,” kusho uNksz Nt’sekhe.
Uthe i-EFF kufanele iyeke ukusebenzisa udlame nokucekela phansi impahla uma kukhona engeneme ngakho.
“Ziningi izindlela zokuveza into osuke unganeme ngayo hhayi ukucekela phansi impahla. I-EFF kufanele ikhokhe umonakalo owenziwe ngamalungu ayo ezitolo zakwaH&M. Kufanele ikhumbule ukuthi kunabantu abaqashiwe ezitolo abangase baphelelwe wumsebenzi uma iH&M ihamba eNingizimu Afrika,” kusho uNksz Nt’sekhe.
UNksz Palesa Kwitshana, oyisikhulu esiphezulu seSA Fashion Institute esiza abasiki bengqephu ukuthi bafake izimpahla zabo ezitolo ezinkulu nokuthi bazivulele ezabo izitolo, uthe ukube izitolo ezinkulu zifaka impahla eyenziwe kuleli ngabe azikho izikhangiso ezifana nesakwaH&M.
“Kuhle ukuthi kukhulunywe ngodaba lwakwaH&M kuphinde kugqugquzelwe izitolo ezinkulu ukuthi zithenge impahla eyenziwe kuleli. Sidinga uhulumeni, izitolo nabantu bethu ukuthi basixhase ngokuthenga impahla. Umkhakha wokuthungwa kwezimpahla udala amathuba amaningi omsebenzi ngakho kufanele kuthengwe impahla yakuleli,” kusho uNksz Kwitshana.
Uthe abakugqugquzeli okwenziwe ngamalungu e-EFF ezitolo zakwaH&M kodwa bayathemba kuzovula abantu, uhulumeni nezitolo ezinkulu amehlo ngokubaluleka kokuthenga okwakhiwe eNingizimu Afrika.
UNksz Amelia-May Woudstra, obhekelele ezokuxhumana kwaH&M South Africa, uthe izitolo zabo zivaliwe okwamanje, zizovulwa uma sebebona ukuthi isimo siphephile.
Uthe abasebenzi babo abangeni esikhangisweni esisuse umsindo futhi bayaxolisa ngaso ngoba kabahambisani nokucwasa.