Bebengakhala ngenye indlela abaqoqa udoti
IMPELASONTO yonke eThekwini bekunyanyeka futhi kunuka kabi njengoba bekuxathuka udoti obusaphazwe yonke indawo ngoba abaqashelwe ukuwuqoqa betelekile.
Ukusaphazeka kukadoti nokugcine sekuphethuka izimpethu akukhubanga nje abahlali baleli dolobha kodwa kushiye nesithombe esibi njengoba kusekhona nezivakashi kwazise amaholidi awakapheli.
Abatelekile baqashwe ngaphansi kohlelo lukahulumeni lokuthuthukiswa kwamakhono, i-Expanded Public Works Programme (EPWP). Bafuna ukuqashwa ngokugcwele.
Ngokukamasipala, abekho abantu abathenjiswe umsebenzi ogcwele kodwa uma abantu sebenawo amakhono kufanele uma kuvela izikhala bafake izicelo njengawo wonke umuntu futhi akubhekwa ukuthi umuntu kade esohlelweni lwe-EPWP.
Siyanyanyeka isenzo salaba basebenzi ngoba sikholwa wukuthi ikhona enye indlela abebengazwakalisa ngayo izikhalo zabo ngaphandle kokubeka impilo yezakhamuzi eThekwini engozini ngoba indawo engcolile iyagulisana futhi kuleli dolobha kunabantu abaziphilisa ngokudayisa ukudla emgwaqweni okuphazamiseka isinkwa sabo uma besebenzela endaweni engcolile.
Laba basebenzi benza le nto edinayo eyenziwa yiningi labantu abatelekayo ngokuhlukumeza abantu abangahlanganise lutho nezimfuno zabo.
NgeSonto ntambama umasipala uthe usuvumelene nabatelekile ukuthi babuyele emsebenzini kodwa bekungakenzeki lutho izolo.
Nokho-ke uhulumeni kufanele ayibhekisise indaba yokuthi abantu baqeqeshelwe amakhono kodwa bese kuphela kanjalo, kuthi uma kuvela izikhala kungabhekwa ukuthi baba kulolu hlelo.
Kanti baqeqeshelwa ukuthi benzeni ngamakhono?
Kufanele kube nokwenziwayo ukuthi amakhono abasize ngoba ngale kwalokho kusho ukuthi kuyadlalwa nje uma kuqeqeshwa abantu kodwa bagcine bangakwazi ukuphila ngalawo makhono.
Kufanele kube nezinkampani ezizimele uhulumeni azosebenzisana nazo ukuze abanye bathi uma bephuma kulolu hlelo baqashwe nayizona ngoba vele ngeke uhulumeni aqashe wonke umuntu.