UThabo kungenzeka ahlale kwiDowns
UYAHLALA kwiMamelodi Sundowns uThabo Nthethe ophelelwa yinkontileka ngoJuni.
UNthethe ulizwa ngendaba ijezi kule sizini ka-2017/18. Umiswe kabi nguModjeka Madisha noWayne Arendse phakathi nenkundla emuva.
Imenenja yakhe uTim Sukazi we-Quality Talent Sports, itshele Isolezwe ukuthi uNthethe kungenzeka ahlale kwiSundowns. “Okwamanje besingakangeni ezingxoxweni neSundowns ngekusasa likaThabo. Nakanjani kule minyaka akuyona ufuna ukudlala kodwa iSundowns isamphethe kahle. Ngonyaka ozayo iSundowns iphindela kwiCaf Champions League. UThabo ubambe elikhulu iqhaza ngesikhathi iqembu linqoba iChampions League ngo-2016 kanti nakulo nyaka udlalile. Njengoba sekuzovulwa ukubhaliswa kwabadlali abazogijima kuChampions League uThabo kungenzeka abhaliswe.”UNthethe (33) ufike kwiSundowns ngo-2014 esuka kwiBloemfontein Celtic. Kuleli qembu usefike wahlabana ngesicoco se-Absa Premiership, Telkom Knockout, Caf Champions Legaue neCaf Super Cup. Lo mdlali uke wayibamba isikhathi eside kwiBafana Bafana. Udlale imidlalo engu21 washaya igoli elilodwa. Ubekhona ngesikhathi iBafana ibamba iqhaza kwiCaf Africa Cup of Nations (Afcon) ngo-2013 eNingizimu Afrika.
NgeSonto ngo-3.30 ntambama uNthethe kubhekwe ukuthi aphinde aqhubeke nokuba wukudla kwebhentshi uma iSundowns isibhekene neLamontville Golden Arrows ePrincess Magogo Stadium, KwaMashu, eThekwini.
ISundowns ikhombisa izimpawu zokubuyelwa yifomu kulezi zinsuku. Isidlale imidlalo emine ilandelana ingashaywa. Iqumbe phansi i-Orlando Pirates, Bidvest Wits neBaroka FC yase idlala ngokulingana ngo 0-0 neChippa United ecijwa nguTebogo “Tebza” Moloi owenza umsebenzi oncomekayo kuleli qembu elidume ngokuxosha abaqeqeshi.