Akafuni nokuyizwa eyabazithwele
AKAFUNI bazithwale abadlali bakhe umqeqeshi weqembu leMaritzburg United eliyibamba kwiMultichoice Diski Challenge (MDC), uSiya Mdluli.Okwenza uMdluli akhulume kanje wukuthi i-United encane isanda kubukisa nge-Orlando Pirates eyibhaxabule ngo 3-1 eGoli, emasontweni amabili adlule.
Kusasa iTeam of Choice izobhekana nabakhaya bePirates, iKaizer Chiefs emdlaweni oseSinaba Stadium, eDaveyton ngo-12 emini. Leli kuzobe kuyidili lokugcina onyakeni lemidlalo yeMDC elizoba kule nkundla. Njengokujwayelekile kungenwa mahhala. Imidlalo izovezwa bukhoma kwiSuperSport kusukela ngo-10 ekuseni.
“Amalungiselelo omdlalo ahamba kahle. Ngicabanga ukuthi okunye okusigqugquzelayo umphumela esiwuthole emdlalweni emasontweni edlule.
Yiwona osenza sifune ukuyolwela amaphuzu amathathu yize sazi ukuthi sizobe sidlala namaqemu angefani. Sizoya emdlalweni ngokukhulu ukuzimisela ngeke sizithwale,” kusho uMdluli.
Ukushaya iPirates kubeke iqembu laseMphithi endaweni yesithathu kwi-log ngamaphuzu angu-18 ngemuva ngephuzu elilodwa emaqenjini aphezulu.
ILamontville Golden Arrows izihola phambili ngamaphuzu angu-19, ilandelwe iBloemfontein Celtic ngamaphuzu alinganayo.
“Ukubanga isicoco akukho emiqondweni yethu.
Njengoba ngasho kusaqala imidlalo, okwethu wukubhekana nomdlalo ngamunye. Kulo esiya kuwona uzofana nowamanqamu. Sizokwenza okufanayo nakweminye ezolandela kuze kufike ekugcineni bese sibona ukuthi lokho kusibeka kuphi,” kusho uMdluli osekhuza ibuya ekuphekeni iTeam of Choice. IChiefs izoza emdlalweni nayo ingazibekile phansi ngemuva kokubhaxabula iChippa United ngo 3-0 emdlalweni odlule.
Imidlalo yeMDC ngempelasonto Kusasa: Chippa United v Golden Arrows (10am, Wolfson Stadium); Ajax Cape Town v Baroka FC (10am, Ikamva Stadium); Polokwane City v Bloemfontein Celtic (10am, Sinaba Stadium); Kaizer Chiefs v Maritzburg United (12pm, Sinaba Stadium); Free State Stars v Bidvest Wits (6pm, TBA).
NgeSonto: Mamelodi Sundowns v Platinum Stars (10am, Sinaba Stadium); AmaZulu v Cape Town City (12pm, King Zwelithini Stadium); SuperSport United v Orlando Pirates (12pm, Sinaba Stadium).